ევროპის ზოგიერთი ელექტროსადგური მუშაობას აჩერებს - გვალვისა და წყლის დეფიციტის შედეგი: რას გამოიწვევს ეს
ევროპაში ხანგრძლივმა სიცხემ და გვალვამ ენერგეტიკულ სექტორზე სერიოზული გავლენა მოახდინა. მდინარე დუნაის წყლის დონის მკვეთრი ვარდნის გამო, უნგრეთმა ქვეყნის მთავარი ატომური ელექტროსადგურის, პაკშის ყველა რეაქტორის დროებით გაჩერების გადაწყვეტილება მიიღო.
- უნგრეთის პრემიერ-მინისტრის, პეტერ მადიარის განცხადებით, ელექტროსადგური 44-წლიანი მუშაობის ისტორიაში პირველად სრულად შეწყვეტს ფუნქციონირებას. მისი თქმით, ყველა რეაქტორი გაითიშება, რადგან მდინარეში წყლის დეფიციტი რეაქტორების გასაგრილებლად საჭირო მოცულობას ვეღარ უზრუნველყოფს.
პაკშის ატომური ელექტროსადგური უნგრეთის ელექტროენერგიის თითქმის 50%-ს გამოიმუშავებს, ამიტომ მისი გაჩერება ქვეყნის ენერგოსისტემაზე მნიშვნელოვან ზეწოლას გამოიწვევს. პრემიერ-მინისტრის თქმით, უახლოესი დღეები განსაკუთრებით რთული იქნება, რადგან ჰაერის ტემპერატურა 40 გრადუს ცელსიუსამდე მოიმატებს, რაც ელექტროენერგიაზე მოთხოვნას კიდევ უფრო გაზრდის.
მთავრობამ უკვე დააწესა ელექტროენერგიის მოხმარების შეზღუდვები მსხვილი საწარმოებისთვის, მათ შორის ნავთობკომპანია MOL-ის, Audi-ის ავტომობილების ქარხნისა და Samsung-ის ბატარეების საწარმოსთვის.
მეზობელ რუმინეთშიც რთული ვითარებაა. წყლის დეფიციტის გამო სამხედროებმა კონტროლირებადი აფეთქებები განახორციელეს, რათა წყალი არხიდან ჩერნავოდას ატომური ელექტროსადგურისკენ გადაემართათ. სადგურის ორი რეაქტორიდან ერთი უკვე გაჩერებულია, ხოლო მეორის მუშაობაც წყლის მარაგზეა დამოკიდებული. ჩერნავოდას ელექტროსადგური ქვეყნის ელექტროენერგიის დაახლოებით 20%-ს აწარმოებს.
- გვალვამ პრობლემები სერბეთშიც შექმნა. ქვეყნის ენერგეტიკის მინისტრის განცხადებით, წყლის დონის შემცირების გამო, ორ უმსხვილეს ჰიდროელექტროსადგურზე ელექტროენერგიის გამომუშავება ნორმალური სიმძლავრის მხოლოდ 20–30%-მდე დაეცა.
ვითარებას დამატებით ართულებს ისიც, რომ უნგრეთი და რუმინეთი უკრაინას ელექტროენერგიას აწვდიან. რუსეთის თავდასხმების შემდეგ უკრაინა ენერგოიმპორტზე მნიშვნელოვნად გახდა დამოკიდებული, თუმცა ახლა რეგიონში გვალვა და ენერგეტიკული პრობლემები ელექტროენერგიის მიწოდებასაც საფრთხეს უქმნის.