SpaceX-ის რაკეტის ნაწილი, 5-სართულიანი შენობის ზომის ობიექტი დღეს მთვარეს დაეჯახება - რა მოხდება?

NASA-ს ინფორმაციით, SpaceX-ის Falcon 9 რაკეტის ზედა საფეხური დღეს, 5 აგვისტოს მთვარის ზედაპირს შეეჯახება.

• სპეციალისტები განმარტავენ, რომ ეს დედამიწისთვის არავითარ საფრთხეს არ წარმოადგენს, თუმცა მეცნიერებისთვის უნიკალური შესაძლებლობა იქნება, რეალურ დროში დააკვირდნენ, რა ხდება, როდესაც დიდი ზომის ობიექტი მთვარეს ეჯახება.

NASA-ს დედამიწასთან ახლოს მდებარე ობიექტების შესწავლის ცენტრის (CNEOS) მონაცემებით, რაკეტის ნაწილი მთვარეს წამში დაახლოებით 2.43 კილომეტრის სიჩქარით დაეჯახება.

Falcon 9 აშშ-იაპონიის ერთობლივი მისიის ფარგლებში გაუშვეს, რომლის მიზანი მთვარეზე ორი სადესანტო აპარატისა და სამეცნიერო აღჭურვილობის მიწოდება იყო. რაკეტის პირველი საფეხური მრავალჯერადი გამოყენებისაა და დედამიწაზე ბრუნდება, თუმცა ზედა საფეხური კოსმოსში რჩება. სწორედ ეს ნაწილი, რომლის ზომაც დაახლოებით ხუთსართულიანი შენობის ტოლია და წონა 4 ტონას აღემატება, დღეს მთვარეს შეეჯახება.

• კემბრიჯის უნივერსიტეტის ასტრონომი მეტ ბოთველი განმარტავს, რომ მთვარეზე ატმოსფეროს არარსებობისა და სუსტი გრავიტაციის გამო, შეჯახება გაცილებით შთამბეჭდავი იქნება, ვიდრე დედამიწაზე მსგავსი მოვლენა. მიუხედავად ამისა, აფეთქება შეუიარაღებელი თვალით არ გამოჩნდება და მისი დაფიქსირება მხოლოდ მძლავრი ტელესკოპებით იქნება შესაძლებელი.

მოვლენას მსოფლიოს სხვადასხვა ობსერვატორია და კოსმოსური აპარატი დააკვირდება, მათ შორის NASA-ს Lunar Reconnaissance Orbiter-ი და სამხრეთ კორეის მთვარის ზონდი Danuri. მეცნიერები შეისწავლიან წარმოქმნილ კრატერს, მტვრის გავრცელებასა და ზედაპირიდან ამოტყორცნილ მასალას, რაც მათ მთვარეზე შეჯახების პროცესების უკეთ გააზრებაში დაეხმარება.

სპეციალისტების შეფასებით, ეს შემთხვევა კიდევ ერთხელ აჩვენებს კოსმოსური ნარჩენების მზარდ პრობლემას. ევროპის კოსმოსური სააგენტოს მონაცემებით, დედამიწის ორბიტაზე ამჟამად 10 სანტიმეტრზე დიდი ზომის დაახლოებით 54 000 ობიექტი მოძრაობს. მეცნიერები აფრთხილებენ, რომ კოსმოსში გაშვებული ხელოვნური ობიექტების რაოდენობის ზრდამ მომავალში შესაძლოა უკონტროლო შეჯახებები და ახალი ნარჩენების წარმოქმნა გამოიწვიოს.

წყარო