"ბათუმელმა გოგონამ ისლამი მიიღო... ეს ნაბიჯი პირად ცხოვრებაში დაგეგმილ სიახლეს დაემთხვა" - რას წერს თურქული მედია ქართველ ქალზე
ზოგჯერ ცხოვრებისეული გარდატეხები სრულიად მოულოდნელად, შორს, სახლიდან ასობით კილომეტრის დაშორებით ხდება. ბათუმელმა ვალერია გურგენაძემ, რომელიც უკვე გარკვეული ხანია თურქეთში, გელიბოლუს ზღვის პროდუქტების საწარმოში მუშაობს, საკუთარ ცხოვრებაში სრულიად ახალი ფურცელი გადაშალა - წერს ადგილობრივი თურქული მედია.
- დიდი ხნის ძიების, კითხვისა და დაკვირვების შემდეგ, ვალერიამ ისლამის მიღება გადაწყვიტა. გელიბოლუს მუნიციპალიტეტის სასულიერო ცენტრში გამართულ ცერემონიაზე მან ახალი სახელი - ლეილა აირჩია.
ყველაზე საინტერესო კი ის არის, რომ ეს ნაბიჯი პირად ცხოვრებაში დაგეგმილ სიახლეს დაემთხვა. ვალერია-ლეილა დაქორწინებას აპირებს, თუმცა რწმენის შეცვლა ქორწილამდე, სრულიად დამოუკიდებლად გადაწყვიტა:
"ძალიან ბედნიერი ვარ. ეს არ ყოფილა ემოციური ან უეცარი ნაბიჯი - დიდხანს ვსწავლობდი ამ საკითხს. გადავწყვიტე, ოჯახის შექმნამდე მიმეღო ეს გადაწყვეტილება. სხვათა შორის, ჩემი მომავალი მეუღლისთვის ეს ნამდვილი სიურპრიზი აღმოჩნდა,“ - ამბობს ქალი.
რიტუალის დასრულების შემდეგ მას შესაბამისი მოწმობა და ყურანი გადასცეს. ასე დაიწყო ბათუმელი გოგოს ახალი ისტორია თურქეთის პატარა ზღვისპირა ქალაქში - უკვე ლეილას სახელით - ვკითხულობთ თურქულ მედიაში.