70 წელზე მეტი ხნის შემდეგ პირველად, ყაზახეთში ვეფხვი ველურ ბუნებაში გაუშვეს - ქვეყნდება კადრები
70 წელზე მეტი ხნის შემდეგ ყაზახეთმა ვეფხვი პირველად გაუშვა ველურ ბუნებაში. ქვეყნის ხელისუფლება ამ მოვლენას ისტორიულ ნაბიჯად აფასებს, რომელიც ვეფხვების ისტორიულ არეალში დაბრუნებისა და რეგიონის ეკოსისტემის აღდგენის მრავალწლიანი პროგრამის ნაწილია.
- ყაზახეთის ეკოლოგიისა და ბუნებრივი რესურსების სამინისტროს ინფორმაციით, 31 ივლისს ილე-ბალხაშის სახელმწიფო ნაკრძალში ზრდასრული დედალი ამურის ვეფხვი, სახელად უმიტი, გაუშვეს. მისი სახელი ყაზახურად "იმედს“ ნიშნავს. სპეციალისტების ცნობით, ვეფხვი უკვე დამოუკიდებლად გადაადგილდება იმ ტერიტორიაზე, სადაც წარსულში კასპიის, ანუ თურანის ვეფხვი ბინადრობდა.
უწყების განცხადებით, ეს ვეფხვების რეინტროდუქციის პროგრამის პირველი პრაქტიკული ეტაპია და ველური ბუნების აღდგენას ისახავს მიზნად.
<iframe width="560" height="315" src="https://www.youtube.com/embed/WC5Xx8BmeWY?si=bg1PHBqgoDsnIpKD" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>- "დღეს მართლაც ისტორიული მოვლენის მომსწრენი გავხდით. ვეფხვის გაქრობიდან 70 წელზე მეტი გავიდა და პირველად ის საკუთარ ისტორიულ ჰაბიტატს დაუბრუნდა. ეს სახელმწიფოს, მეცნიერებისა და საერთაშორისო პარტნიორების მრავალწლიანი თანამშრომლობის შედეგია“, – განაცხადა ყაზახეთის ეკოლოგიისა და ბუნებრივი რესურსების მინისტრმა იერლან ნისანბაევმა.
ვეფხვი ყაზახეთის ტერიტორიიდან 1948 წელს გაქრა. მისი დაბრუნებისთვის ქვეყანამ ათ წელზე მეტი იმუშავა. ამ პერიოდში განხორციელდა ეკოსისტემის აღდგენის ფართომასშტაბიანი პროექტები, მათ შორის ველური ბუნების დაცვა, ჩლიქოსანი ცხოველების პოპულაციის გაზრდა, ტყის ეკოსისტემების აღდგენა და ბრაკონიერობის წინააღმდეგ ბრძოლის გაძლიერება.