ცხოველთა დაცვის საზოგადოების მაშველებმა, სააცხოვრებელი სახლის ფანჩატურის იატაკი აყარეს იმისთვის, რომ ეგზოტიკური პითონი უვნებელი ამოეყვანათ
აშშ-ში, ნიუ-ჯერსიში მცხოვრები ოჯახის ეზოში დიდი ზომის, მუცელგამობერილი ეგზოტიკური პითონი იპოვეს. მოგვიანებით ქვეწარმავალს რენტგენის სურათი გადაუღეს, რამაც მისი ასეთი მდგომარეობის მიზეზი გამოავლინა.
როგორც სახლის მფლობელმა ედ დეილიმ განუცხადა, მისმა მეუღლემ ქვეწარმავალი მაშინ შენიშნა, როდესაც სახლის ეზოში ყვავილებს რწყავდა.
გველი, რომელიც დაახლოებით 2.5 მეტრის სიგრძის ბირმული პითონი აღმოჩნდა ეზოში მდგარი ფანჩატურის ქვეშ შეძვრა და ორმოში დაიმალა.
ოჯახმა დაუყოვნებლივ გამოიძახა ცხოველთა დაცვის საზოგადოება. მაშველებმა ფანჩატურის იატაკის ფიცრები აყარეს და ქვეწარმავალი სამალავიდან ამოიყვანეს.
ვეტერინარების მიერ გადაღებულმა რენტგენმა აჩვენა, რომ იშვიათი ქვეწარმავლის ბოლო მსხვერპლი დიდი ზომის ოპოსუმი გახდა.