"ამ ადამიანს პირადად მე ვყავარ ამოჩემებული" - მამუკა მდინარაძე ალეკო ელისაშვილზე
"ამ საკითხზე კომენტარს ერთი მარტივი მიზეზის გამო არ გავაკეთებ - როგორც მეუბნებიან და ინტერვიუებს ვნახულობ, ამ ადამიანს [ალეკო ელისაშვილს] პირადად მე ვყავარ ამოჩემებული და რატომღაც ჰგონია, რომ მისი დანაშაული ჩემი ინსპირირებულია", - ასე უპასუხა რეგიონული განვითარების მინისტრმა მამუკა მდინარაძემ ალეკო ელისაშვილის საქმესთან დაკავშირებით "საერთაშორისო გამჭვირვალობა-საქართველოს” დასკვნაზე დასმულ კითხვას.
- "ეს რამდენად სერიოზულია?! არ ვიცი, რა აქვს მას გონებაში. შევეცდები ამ ადამიანის ქმედების შეფასებისა და სამართლებრივი კვალიფიკაციისგან თავი შევიკავო, რადგან ამ ადამიანს ისედაც რჩება შთაბეჭდილება, რომ ჩემი ინტერესი იყო, რომ გაქცეულიყო, დანაშაული ჩაედინა, სასამართლოს შენობა გადაეწვა ან ტერორისტული აქტი ჩაედინა. ამის შეფასებაში მე არ შევალ“, - განაცხადა მდინარაძემ.
საერთაშორისო გამჭვირვალობა-საქართველოს” ინფორმაციით, "მოქალაქეების“ ლიდერის, ალექსანდრე ელისაშვილის ქმედებაში ტერორისტული მიზანი არ იკვეთება.
როგორც ორგანიზაციის მიერ გავრცელებულ განცხადებაშია ნათქვამი, ელისაშვილის პიროვნების, მისი პოლიტიკური კუთვნილების, უკანასკნელ წლებში მმართველ პარტიასთან მისი სისტემატური კონფლიქტის და სხვა კონტექსტური გარემოებების გათვალისწინებით, ჩნდება გონივრული ეჭვი, რომ ელისაშვილის გამტყუნება ტერორისტული აქტის და არა სხვისი ქონების დაზიანების მუხლით, შესაძლოა, მოხდა იმის გამო, რათა სამაგალითოდ დასჯილიყო პოლიტიკური ოპოზიციის ერთ-ერთი გამოჩენილი წარმომადგენელი და, ამასთანავე, ჩრდილი მიჰყენებოდა, როგორც საკუთრივ ელისაშვილის პიროვნებას, ისე იმ პარტიას, რომლის წევრიც ის არის, და უფრო ზოგადად თუ ვიმსჯელებთ, მთელ პროდასავლურ ოპოზიციას.