მსოფლიო მზის იშვიათი დაბნელებისთვის ემზადება - დღეს ცაზე უნიკალურ სანახაობას მილიონობით ადამიანი იხილავს
დღეს, 12 აგვისტოს, მილიონობით ადამიანი იშვიათ ციურ მოვლენას, მზის დაბნელებას იხილავს. ესპანეთის ჩრდილოეთ და ცენტრალურ ნაწილში, პორტუგალიის ზოგიერთ რეგიონში, ასევე გრენლანდიასა და ისლანდიაში დამკვირვებლები მზის სრულ დაბნელებას ნახავენ, ხოლო დასავლეთ ევროპის ბევრ ქვეყანაში მოვლენა ნაწილობრივი იქნება ხილული.
- სრული დაბნელება ხდება მაშინ, როდესაც მთვარე დედამიწასა და მზეს შორის ზუსტად ხვდება და მზის დისკოს მთლიანად ფარავს. ამ დროს მთვარის ჩრდილი დედამიწის ზედაპირზე ეცემა.
ეს ბოლო ორი ათწლეულის განმავლობაში კონტინენტურ ევროპაში პირველი სრული მზის დაბნელებაა.
ესპანეთში ადამიანები ამ მოვლენას ადგილობრივი დროით დაახლოებით 20:26-დან 20:33 საათამდე დააკვირდებიან - მზის ჩასვლამდე ცოტა ხნით ადრე. ზუსტი დრო კონკრეტულ ადგილმდებარეობაზე იქნება დამოკიდებული. ლონდონში დაბნელება 18:17 საათზე დაიწყება, მაქსიმუმს 19:13 საათზე მიაღწევს პიკს და 20:06 საათზე დასრულდება.
განსაკუთრებით კარგი ხილვადობა იქნება კორნუოლში, სადაც მზის დაახლოებით 96% დაიფარება, ხოლო შოტლანდიის დასავლეთ ნაწილში - დაახლოებით 93%.
"ეს ჰორიზონტთან ახლოს მოხდება, ამიტომ მნიშვნელოვანია ისეთი ადგილის პოვნა, საიდანაც დასავლეთის ჰორიზონტი კარგად ჩანს და ხედს შენობები ან ხეები არ ფარავს“, - ამბობს გრინვიჩის სამეფო ობსერვატორიის ასტრონომი კარის ჰერბერტი.
მზის სრული დაბნელება მეცნიერებისთვის მხოლოდ სანახაობა არ არის. ის იშვიათ შესაძლებლობას იძლევა, უფრო დეტალურად შეისწავლონ მზის გარე ატმოსფერო - კორონა.
"დაბნელება ბევრ რამეს გვიყვება მზის ატმოსფეროს ქიმიის შესახებ და იმაზე, როგორ იცვლება ის მზის აქტივობის 11-წლიანი ციკლის განმავლობაში“, - განმარტავს არგო.
ციური სანახაობა 12 აგვისტოს მხოლოდ დაბნელებით არ დასრულდება - იმავე ღამეს პერსეიდების მეტეორული ნაკადის პიკია მოსალოდნელი, რაც ცაზე დაკვირვებისთვის კიდევ ერთ მიზეზს იძლევა.