10 წლის წინ დაკარგული კატა სახლში დაბრუნდა, თანაც პატრონის დაბადების დღეზე - "ეს სასწაულია"
ნამდვილი სასწაულები მაშინ ხდება, როცა მათ ყველაზე ნაკლებად ველოდებით. სწორედ ასეთი საოცარი ისტორიის მოწმე გახდა უელსში მცხოვრები ოჯახი: 13 წლის ზოლიანი კატა, სახელად ჩარლი, რომელიც მთელი 10 წლის განმავლობაში დაკარგულად ითვლებოდა, მოულოდნელად საკუთარ სახლს დაუბრუნდა - თანაც პატრონის 30 წლის იუბილეზე!
- ყველაფერი 2016 წლის აპრილში დაიწყო. ჰანა და ლუსი რობერტსონებმა საცხოვრებელი ადგილი შეიცვალა და ნიუბრიჯიდან კერფილის საგრაფოში მდებარე აბერკარნში გადავიდა. თან წაიყვანა თავისი 3 წლის კატა - ჩარლი, რომელსაც პატრონები ცნობისმოყვარე და თავისუფლებისმოყვარე ხასიათის ცხოველად აღწერდნენ.
როგორც ეზოს კატას სჩვევია, ჩარლის ქუჩებში ხეტიალი და გარემოს დაზვერვა უყვარდა. ახალ სახლში გადასვლიდან სულ რაღაც სამ დღეში, ჩარლი სასეირნოდ გავიდა და... უკან აღარ დაბრუნებულა.
ლუსი და ჰანა რობერტსონები განადგურებულები იყვნენ.
"ეს გულის მომკვლელი იყო. ძალიან გვეშინოდა, რომ მანქანამ გაიტანა და ცოცხალი აღარ იყო“, - იხსენებს ლუსი. ოჯახმა თვეები დახარჯა ძებნაში:
აკეთებდნენ განცხადებებს და კითხულობდნენ სამეზობლოში, ავრცელებდნენ პოსტებს Facebook-ზე, ამოწმებდნენ თითოეულ შეტყობინებას. იყო რამდენიმე შემთხვევა, როდესაც ხალხი ამბობდა, რომ მსგავსი კატა ნახეს, მაგრამ პატრონები ადგილზე მისვლას ვერ ასწრებდნენ - ჩარლი თითქოს ჰაერში ქრებოდა. მიუხედავად იმისა, რომ იმედი არასდროს დაჰკარგვიათ, დროთა განმავლობაში რეალობას შეეგუნენ.
დაუჯერებელი დაბრუნება 30-ე დაბადების დღეზე
გავიდა მთელი 10 წელი. 2026 წლის 29 ივლისს ლუსი რობერტსონი თავის 30 წლის იუბილეს აღნიშნავდა, როდესაც ოჯახში ტელეფონის ზარი გაისმა. რეკავდა აბერკარნის ვეტერინარული კლინიკა.
ვეტერინარმა ჰანას განუცხადა, რომ მათთან ჩარლი იმყოფებოდა.
როგორ იპოვეს ჩარლი?
აბერკარნში მცხოვრებმა ადგილობრივმა მცხოვრებმა შენიშნა კატა, რომელიც ბუჩქებში ცხოვრობდა. კეთილშობილი ადამიანი რამდენიმე კვირის განმავლობაში კვებავდა "მაწანწალა“ კატას. ბოლოს გადაწყვიტა, ცხოველი ვეტერინართან წაეყვანა შემოწმებაზე. კლინიკაში კატას მიკროჩიპი დაუსკანერეს - და სწორედ ასე იპოვეს ჰანას 10 წლის წინანდელი საკონტაქტო ნომერი. თვითონ ვეტერინარიც კი შოკირებული იყო, როცა შეიტყო, რომ ეს ოთხფეხა პაციენტი მთელი ათი წლის განმავლობაში დაკარგულად ითვლებოდა.
როგორია ჩარლი 10 წლის შემდეგ?
ყველაზე გასაოცარი ის არის, რომ 13 წლის ჩარლი ჯანმრთელია. მისი ბეწვი მოვლილია და საერთოდ არ გამოიყურება უსახლკარო, "მოუვლელ“ კატასავით. პატრონები ვარაუდობენ, რომ ჩარლიმ ამ წლების განმავლობაში დიდი თავგადასავალი გადაიტანა, თუმცა ზუსტად რას აკეთებდა 10 წელი, ეს მის საიდუმლოდ დარჩება.
"მან მაშინვე გვიცნო! ეს ძალიან თბილი მომენტი იყო, რადგან ასეთ რამეს ნამდვილად არ ველოდით. საერთოდ არ შეცვლილა, ზუსტად ისე გამოიყურება, როგორც ჩვენს ძველ ფოტოებზე", - ამბობს ლუსი სიხარულით.
ახალი ცხოვრება და "ვარსკვლავური“ სტატუსი
ახლა ჩარლი ხელახლა ეჩვევა ოჯახურ გარემოს. ოჯახში სხვა შინაური ცხოველებიც არიან, ამიტომ მათი შეგუება "ჯერ კიდევ პროცესშია, ნელ-ნელა ყველაფერი ლაგდება“.
ჩარლის განსაკუთრებით მოსწონს უხვად მიღებული საკვები და ყურადღება. ის ისეთივე მეგობრულია, როგორიც 10 წლის წინ იყო.
"ახლა ისეთი შეგრძნება მაქვს, თითქოს თვითონაც იცის, რომ ნამდვილი ვარსკვლავი და სენსაცია გახდა. ეს ისტორია ადასტურებს, თუ რამდენად მნიშვნელოვანია შინაური ცხოველების მიკროჩიპირება - სწორედ პატარა ჩიპმა გახადა შესაძლებელი სასწაული 10 წლის შემდეგ", - ამბობს ლუსი.