"შსს-მ დადო არასწორი ინფორმაცია... გავასაჯაროებ ყველაფერს" - ტარიელ კაკაბაძე გურამ დადიანიძესთან დაკავშირებით შსს-ს განცხადებაზე
"შსს-მ დადო არასწორი ინფორმაცია იმასთან დაკავშირებით, თითქოს მე წინასწარ ვიცოდი რომ რაღაც პოსტი უნდა დადებულიყო ოსურ ენაზე", - ასე ეხმაურება ადვოკატი ტარიელ კაკაბაძე შსს-ს მიერ გაუჩინარებულ გურამ დადიანიძესთან დაკავშირებით გამოქვეყნებულ ინფორმაციას.
"შსს-მ დადო არასწორი ინფორმაცია იმასთან დაკავშირებით, თითქოს მე წინასწარ ვიცოდი რომ რაღაც პოსტი უნდა დადებულიყო ოსურ ენაზე.
აქამდე ვინარჩუნებდი კოლეგიალობა, მაგრამ ახლა უკვე ვხვდები, რომ არ სურთ ამ საქმის გამოძიება.
ცდილობენ ჩემს დისკრედიტაციას.
შსს-ს განცხადება რომ უდიდესი ტყუილია, ამის დასადასტურებლად ცოტა ხანში დავდებ სქრინებს და გავასაჯაროვებ ყველაფერს", - წერს კაკაბაძე
-
ცნობისთვის, 12 წლის წინ გაუჩინარებული გურამ დადიანიძის ფეისბუქ გვერდზე რამდენიმე დღის წინ გამოქვეყნებულ პოსტთან დაკავშირებით შსს-მ ინფორმაცია გამოაქვეყნა.
"გვსურს, საზოგადოებას მივაწოდოთ ინფორმაცია, დუშეთის მუნიციპალიტეტში გაუჩინარებული არასრულწლოვნის გურამ დადიანიძის "ფეისბუქ“ გვერდზე განთავსებულ პოსტთან დაკავშირებით ჩატარებული მოკვლევის შედეგებზე.
გურამ დადიანიძის "ფეისბუქ“ გვერდზე, მიმდინარე წლის 18 აგვისტოს განთავსებული პოსტის წარმომავლობის დადგენის მიზნით, მცხეთა-მთიანეთის პოლიციის დეპარტამენტის თანამშრომლებმა ინტენსიურ რეჟიმში განახორციელეს არაერთი შესაბამისი საგამოძიებო და საპროცესო მოქმედება.
ჩატარებული მოკვლევის შედეგად დადგინდა, რომ გურამ დადიანიძის ფეისბუქის გვერდზე აღნიშნული პოსტის გამოქვეყნების შესახებ ინფორმაციას წინასწარ ფლობდნენ, როგორც გურამ დადიანიძის დედა - სოფო ბიბილაშვილი, ასევე ადვოკატი ტარიელ კაკაბაძე", - ნათქვამია შსს-ს განცხადებაში.