"არ გახეთქოთ ბუშტუკები და მოერიდეთ მზეს" - როგორ ავირიდოთ თავიდან მზით დამწვრობა და ვინ შედის მაღალი რისკის ჯგუფებში: რეკომენდაციები დაავადებათა კონტროლის ეროვნული ცენტრისგან
დაავადებათა კონტროლისა და საზოგადოებრივი ჯანმრთელობის ეროვნული ცენტრი მზისგან თავის დაცვისა და დამწვრობის პრევენციისთვის რეკომენდაციებს ავრცელებს.
- დაავადებათა კონტროლისა ეროვნული ცენტრის მიერ გავრცელებულ ვიდეოში გარემოსა და ერთიანი ჯანმრთელობის დეპარტამენტის უფროსი ნია გიუაშვილი ამბობს, რომ მზის გამოსხივება ჯანმრთელობის მნიშვნელოვან რისკებთანაა დაკავშირებული და შესაძლოა გამოიწვიოს კანის სიმსივნე და მხედველობის დაზიანება.
ნია გიუაშვილი საზოგადოებას მოუწოდებს, მოერიდონ პიკურ საათებში მზეზე ყოფნას და გამოიყენონ სათვალე და მზისგან დამცავი.
"მზის გამოსხივება ჯანმრთელობის მნიშვნელოვან რისკებთან და ისეთი დაავადებების ზრდასთან არის დაკავშირებული, როგორიც არის მზით გამოწვეული დამწვრობა, კანის სხვადასხვა ტიპის კეთილ და ავთვისებიანი სიმსივნეები და მხედველობის დაზიანებით მიმდინარე დაავადებები.
შესაბამისად, ნამზეურის მიღებას განსაკუთრებული სიფრთხილით უნდა მოვეპყროთ.
რა თქმა უნდა, მზეს აქვს მნიშვნელობა ორგანიზმისთვის, რათა შეივსოს დ ვიტამინით, თუმცა, დამწვრობამ შესაძლებელია განაპირობოს კანის სხვადასხვა ტიპის დაავადებები და მზისადმი გადაჭარბებული ექსპოზიცია მიზეზი შეიძლება გახდეს ამ დაავადებების განვითარების.
რაც უფრო მაღლაა მზის დგომა, მით უფრო მაღალია მზის გამოსხივება და შესაბამისად, შუადღეს, როდესაც მზის დგომა ყველაზე მაღალია, გამოსხივების ინდექსი 3-ს აჭარბებს, აუცილებელია სხეული ზედმეტი გამოსხივებისგან დავიცვათ სპეციალური დამცავი სათვალით (რომლის დაცვის ფაქტორი 99-100%-ს უნდა შეადგენდეს) და სხვადასხვა ტიპის კანის დამცავი საშუალებებით" - ამბობს ნია გიუაშვილი.
- დაავადებათა კონტროლის ცენტრის ინფორმაციით, მაღალი რისკის ჯგუფებში შედიან ღია ფერის კანის, თმისა და თვალის მქონე პირები, 6 წლამდე ასაკის ბავშვები და 60+ წლის პირები.
როგორ დავიცვათ თავი?
- მოერიდეთ პიკურ საათებს: 10:00-დან 16:00 საათამდე.
- გამოიყენეთ მზისგან დამცავი: SPF 30+ (წაისვით გასვლამდე 20 წუთით ადრე, განაახლეთ ყოველ 2 საათში).
- ატარეთ დამცავი სამოსი: ფართოფარფლებიანი ქუდი, მუქი სათვალე და ღია ფერის ნატურალური ტანსაცმელი.
- დამწვრობის შემთხვევაში: არ გახეთქოთ ბუშტუკები და მოერიდეთ მზეს.
- მიმართეთ ექიმს: თუ დამწვრობა მიიღო ერთ წლამდე ასაკის ბავშვმა, აღინიშნება მაღალი სიცხე ან ძლიერი ტკივილი.