მამამ 7 წლის შვილი ფუძიამას მთაზე მარტო დატოვა, რათა გზა უფროს ვაჟთან ერთად გაეგრძელებინა - იაპონიაში მომხდარი შოკისმომგვრელი ამბის დეტალები

იაპონიაში, პოლიციამ მამა მკაცრად გაკიცხა მას შემდეგ, რაც მან თავისი შვილი ქვეყნის უმაღლეს მთაზე რამდენიმე საათით სრულიად მარტო, მხოლოდ გამაგრილებელი სასმლითა და წასახემსებლით დატოვა.

7 წლის ბიჭუნა ნისლიან და წვიმიან ამინდში, ზღვის დონიდან 2 000 მეტრზე მეტ სიმაღლეზე, სკამზე მჯდომი იპოვეს. როგორც ცნობილი გახდა, 48 წლის მამამ შვილს მას შემდეგ უთხრა “აქ დამელოდე“, რაც ბიჭმა დაღლილობის გამო წუწუნი დაიწყო, თავად კი გზა უფროს ვაჟთან ერთად მწვერვალისკენ განაგრძო.

• 8-საათიანი ლოდინი სადგურთან

ბავშვი მთის თავშესაფრის თანამშრომლებმა საფეხმავლო მარშრუტის მეექვსე სადგურთან ახლოს იპოვეს და პოლიციას შეატყობინეს. ბავშვის მამას კი მეშვიდე და მერვე სადგურებს შორის მიაკვლიეს, რაც ბიჭის ადგილსამყოფლიდან დაახლოებით 3 საათის საფეხმავლო სავალზეა.

ბიჭუნა ხუთშაბათს, ადგილობრივი დროით დილის 07:30 საათზე სრულიად მარტო იპოვეს. 8-საათიანი ლოდინის შემდეგ ბავშვი საკმაოდ “დაღლილი და გაღიზიანებული“ იყო. პოლიციის ოფიცრებმა მამა მას შემდეგ გაკიცხეს, რაც ის ზედა სადგურიდან დაბრუნდა და შვილს შეუერთდა.

“იმ შემთხვევაშიც კი, თუ მცირეწლოვანმა მთაზე ერთად ასვლაზე უარი თქვა, ბავშვის დატოვება მაინც მიუღებელია“, - განაცხადა ერთ-ერთმა პოლიციელმა. მამამ თავისი ნაჩქარევი გადაწყვეტილების გამო ბოდიში მოიხადა.

• საშიში მარშრუტი და ფუძიამას სხვა შემთხვევები

ოჯახი ფუძიამას მთაზე ფუძინომიას მარშრუტით მიდიოდა, რომელიც მეხუთე სადგურიდან იწყება და სადაც მისვლა საზოგადოებრივი ტრანსპორტით არის შესაძლებელი. საფეხმავლო გიდების რეკომენდაციით, ამ წერტილიდან მწვერვალამდე ასვლას დაახლოებით 5 საათი, ხოლო უკან ჩამოსვლას კიდევ 3 საათი სჭირდება.

ფუძიამა, რომლის სიმაღლეც 3 776 მეტრია, ბოლო წლებში არაერთი ინციდენტის ადგილი გახდა. მიმდინარე წლის ივლისში, 99 წლის ქალის გადარჩენა გახდა საჭირო, რომელიც მთაზე ასვლისას წაიქცა და თეძო და ზურგი დაიზიანა.

გასულ წელს კი, 27 წლის უნივერსიტეტის სტუდენტი, რომელიც მთაზე ოფიციალური სეზონის მიღმა ავიდა, ოთხ დღეში ორჯერ გადაარჩინეს. აღსანიშნავია, რომ ის მთაზე უკან დაკარგული მობილური ტელეფონის საძებნელად დაბრუნდა.

ფუძიამა, რომელიც ტოკიოს სამხრეთ-დასავლეთით მდებარეობს, მოქმედი ვულკანია, რომელსაც 2013 წელს მსოფლიო მემკვიდრეობის სტატუსი მიენიჭა. იგი იაპონიის სამი ტრადიციული “წმინდა მთიდან“ ერთ-ერთია, მთებთან - ტატესა და ჰაკუსთან ერთად.

ყოველწლიურად მთაზე ასვლას დაახლოებით 200 000 ადამიანი ცდილობს. თუმცა, გადატვირთულობის თავიდან ასაცილებლად, ზოგიერთ მარშრუტზე ყოველდღიური ლიმიტები მოქმედებს.

წყარო