"თანხის მიღების ნაცვლად, თქვენი ანგარიშიდან ფული იკარგება" - გაფრთხილება ახალი თაღლითური სქემის შესახებ
ორგანიზაცია "საზოგადოება და ბანკები", რომლის ხელმძღვანელი გიორგი კეპულაძეა, საზოგადოებას თაღლითობის ახალი სქემის შესახებ აფრთხილებს.
როგორც ორგანიზაციის მიერ გავრცელებულ ინფორმაციაშია აღნიშნული, ის ადამიანები, ვინც სხვადასხვა პლატფორმებზე ნივთებს ყიდიან, განსაკუთრებით ყურადღებით უნდა იყვნენ.
"ფინანსური თაღლითობის ახალი სქემა. თუ სხვადასხვა ონლაინპლატფორმაზე ნივთებს ყიდით, განსაკუთრებული ყურადღება გმართებთ. გააქტიურდა თაღლითობის ახალი სქემა, რომელიც უშუალოდ გამყიდველებზეა გათვლილი.
როგორ მუშაობს თაღლითური სქემა?
- თაღლითები გიკავშირდებიან, როგორც დაინტერესებული მყიდველები;
- გიგზავნიან ცნობილი და სანდო გადახდის პლატფორმის ყალბ ბმულს, სადაც კომპანიის დასახელებაში, შესაძლოა, მხოლოდ ერთი ასო იყოს შეცვლილი;
- გთხოვენ ბმულზე გადასვლას და მონაცემების შეყვანას, თითქოსდა ნივთის ღირებულების ჩასარიცხად;
- მონაცემების შეყვანის შემდეგ, თანხის მიღების ნაცვლად, თქვენი ანგარიშიდან ფული იკარგება.
არავითარ შემთხვევაში არ შეიყვანოთ გაურკვეველ ბმულებზე:
- მობაილბანკის მომხმარებლის სახელი;
- პაროლი;
- SMS ერთჯერადი კოდი;
- საბანკო ბარათის მონაცემები.
მთავარი წესი, რომელიც უნდა გახსოვდეთ:
როდესაც თანხის მიღება გსურთ, გადამხდელს მხოლოდ თქვენი ანგარიშის ნომერი (IBAN) სჭირდება. ყოველთვის ყურადღებით გადაამოწმეთ ვებგვერდის მისამართი და კომპანიის დასახელების თითოეული სიმბოლო," - ნათქვამია განცხადებაში.