გაუფორმდება თუ არა ჯუანშერ ბურჭულაძეს საპროცესო შეთანხმება - რას ამბობს ადვოკატი?
გაუფორმდება თუ არა ჯუანშერ ბურჭულაძეს საპროცესო შეთანხმება, ჯერჯერობით გადაწყვეტილი არ არის, - ამის შესახებ “ინტერპრესნიუსს” თავდაცვის ყოფილი მინისტრის, ჯუანშერ ბურჭულაძის ადვოკატმა, მარიამ შათირიშვილმა განუცხადა.
- ადვოკატმა უპასუხა კითხვას გენერალური პროკურატურის განცხადების შესახებ, რომლის მიხედვითაც, ქვეყნის ყოფილი პრემიერ-მინისტრის, ირაკლი ღარიბაშვილისთვის ახალი ბრალის წარდგენა გადაწყდა მას შემდეგ, რაც ღარიბაშვილის მიერ დიდი ოდენობით ქრთამის აღების ფაქტზე გამოძიებას ინფორმაცია თავდაცვის სამინისტროს ყოფილმა მაღალჩინოსანმა, ვასილ მხეიძემ მიაწოდა, ისე როგორც გამოძიებასთან ითანამშრომლა თავად ჯუანშერ ბურჭულაძემაც.
“რაც შეეხება საპროცესო შეთანხმებას, ამაზე პირველ ინსტანციაში იყო საუბარი, უბრალოდ პირობები არ არის შეთანხმებული და გადაწყვეტილებაც არ არის მიღებული”, - განაცხადა მარიამ შათირიშვილმა.
ცნობისთვის, საქართველოს ყოფილ პრემიერ-მინისტრ, პატიმრობაში მყოფ ირაკლი ღარიბაშვილს ახალი ბრალი წარუდგინეს. შესაბამისი განცხადება გენერალურ პროკურატურაში გამართულ ბრიფინგზე გაკეთდა. როგორც გენერალური პროკურორის მოადგილე ამირან გულუაშვილმა განაცხადა, საქმე ეხება კორუფციულ დანაშაულს, კერძოდ, განსაკუთრებით დიდი ოდენობით თანხის აღებას.
პროკურატურის ინფორმაციით, საქართველოს ყოფილი პრემიერ-მინისტრის, ირაკლი ღარიბაშვილის მიერ დიდი ოდენობით ქრთამის აღების ფაქტთან დაკავშირებით, საგამოძიებო ორგანოს ინფორმაცია თავდაცვის ყოფილი მინისტრის, ჯუანშერ ბურჭულაძის ნათესავმა, ვასილ მხეიძემ მიაწოდა. ასევე, უწყების ცნობით, გამოძიებასთან ითანამშრომლა თავად ჯუანშერ ბურჭულაძემაც. საქმე ეხება თავდაცვის სამინისტროსთვის საჭირო სამედიცინო ინვენტარისა და აპარატურის შეძენის მიზნით, ირაკლი ღარიბაშვილის პრემიერობის პერიოდში ჩატარებულ რამდენიმე საიდუმლო შესყიდვას.