სამშობიაროში გაჩენილ ხანძარს 14 ახალშობილი ემსხვერპლა - ტრაგედია პაკისტანში: რა ხდება ამ წუთებში ადგილზე?
პაკისტანის დედაქალაქ ისლამაბადში საშინელი ტრაგედია დატრიალდა. ერთ-ერთი სახელმწიფო საავადმყოფოს სამშობიარო ბლოკში გაჩენილ ძლიერ ხანძარს, სულ მცირე, 14 ახალშობილი ემსხვერპლა. მაშველებმა მხოლოდ ერთი ჩვილის გადარჩენა შეძლეს.
ხანძარი ისლამაბადის ერთ-ერთი უმსხვილესი სახელმწიფო კლინიკის, “პაკისტანის სამედიცინო მეცნიერებათა ინსტიტუტის“ (PIMS) დედათა და ბავშვთა ცენტრის მესამე სართულზე გაჩნდა. საავადმყოფოს წარმომადგენლის, დოქტორ ანეზა ჯალილის განცხადებით, ხანძრის გაჩენის მომენტში პალატაში 15 ახალშობილი იმყოფებოდა. მათგან 14 ტრაგიკულად დაიღუპა, ხოლო ერთი გადარჩენილი ახალშობილი ამჟამად ექიმების მეთვალყურეობის ქვეშაა.
ამ დროისთვის ხანძარი ლიკვიდირებულია, ხოლო დაშავებულები რეანიმაციულ განყოფილებაში (ICU) არიან გადაყვანილები. საგანგებო სიტუაციების მართვის სამსახურმა კლინიკიდან, სულ მცირე, 19 ადამიანის ევაკუაცია მოახერხა, მათ შორის 10 ქალის, 7 ბავშვისა და ორი მამაკაცის.
ტრაგედიის ადგილზე ამჟამად მობილიზებულია პოლიცია და სახანძრო ბრიგადები, საავადმყოფოს პერიმეტრს კი მედიის წარმომადგენლები აკონტროლებენ.
კლინიკასთან შეკრებილი მშობლები გარდაცვლილი შვილების ცხედრების დაუყოვნებლივ გადაცემას ითხოვენ. თუმცა, სამართალდამცველების განცხადებით, გარდაცვლილი ახალშობილების სხეულები იმდენად მძიმედ არის დამწვარი, რომ მათი იდენტიფიცირება მხოლოდ დნმ-ის ანალიზის საფუძველზე იქნება შესაძლებელი. პოლიციის განმარტებით, ცხედრები მშობლებს მხოლოდ ამ პროცედურის დასრულების შემდეგ გადაეცემათ.
მომხდარს პაკისტანის პრემიერ-მინისტრი შეჰბაზ შარიფი გამოეხმაურა, რომელმაც მომხდარს “გამოუსწორებელი ტრაგედია“ უწოდა და გარდაცვლილთა ოჯახებს სამძიმარი გამოუცხადა.
“ბავშვებთან დაკავშირებული მსგავსი მდგომარეობა გამოუსწორებელია. ჩემი გული ამ ტრაგიკული შემთხვევის გამო დამძიმებულია“, - აღნიშნულია პრემიერის ოფისის განცხადებაში.
პრემიერ-მინისტრის ბრძანებით, საქმეზე დაუყოვნებლივი გამოძიება დაიწყო. ისლამაბადის საოლქო მაგისტრატმა სპეციალური კომისია შექმნა, რომელსაც ხანძრის გამომწვევი მიზეზების დასადგენად და ზუსტი ფაქტების გამოსავლენად ანგარიშის წარდგენა 24 საათის ვადაში დაევალა. ამ ეტაპზე ხანძრის გაჩენის კონკრეტული მიზეზი უცნობია.