არქეოლოგიური აღმოჩენა თბილისის ცენტრში - რუსთაველის გამზირზე შუა საუკუნეების კერამიკის სახელოსნო და კერამიკული ნაწარმის ფრაგმენტები აღმოაჩინეს

რუსთაველის გამზირზე, მიმდინარე სარეაბილიტაციო სამუშაოების პროცესში, მოსწავლე-ახალგაზრდობის სასახლის მიმდებარედ, შუა საუკუნეების კერამიკის სახელოსნო და კერამიკული ნაწარმის ფრაგმენტები აღმოაჩინეს. ამის შესახებ ინფორმაციას "საზოგადოებრივი მაუწყებელი" ავრცელებს.

გამზირზე ამ ეტაპზე არქეოლოგიური გათხრები მიმდინარეობს.

• არქეოლოგი მერაბ ძნელაძე, რომელიც ადგილზე მუშაობს, აცხადებს, რომ ეს არის დიდი მნიშვნელობის აღმოჩენა და მრავალი წელი ელოდა როდის გაიხსნებოდა რუსთაველის გამზირი.

მისივე თქმით, გამომდინარე იქიდან, რომ აღმოჩენა ახალია, ჯერ რთულია ზუსტი წლების დადგენა, თუმცა, უხეში საანგარიშო პერიოდი X-XII საუკუნეებს მოიცავს, იქამდე სანამ დავით აღმაშენებელი გახდებოდა მეფე.

"ეს არის სახელოსნო უბანი, ქურა, სადაც გამოიწვებოდა კერამიკა. როგორც ჩანს, ამ პერიოდში, როცა მოქმედებდა ეს სახელოსნო, ხდება რაღაც შემოსევა და იძულებულნი არიან დატოვონ ეს ტერიტორია" - ამბობს არქეოლოგი მერაბ ძნელაძე.

"საზოგადოებრივი მაუწყებლის" ცნობითვე, რუსთაველის გამზირზე აღმოჩენილია სხვადასხვა სახის არტეფაქტი: მოჭიქული კერამიკა, თიხის ჭურჭელი, სასმისის ფრაგმენტები, დოქები და ა.შ.

• შეგახსენებთ, რომ გამზირზე სარეაბილიტაციო სამუშაოების დაწყების შემდეგ, აგვისტოს შუა რიცხვებში, გავრცელდა ინფორმაცია, რომ ტერიტორიაზე აგურის წყობები და კერამიკული ჭურჭელი იქნა აღმოჩენილი.