დანიაში კაცმა ეზოში მუშაობისას 18,5კგ-იანი განძი იპოვა - ის ვიკინგების ეპოქისაა: რა იდო სპეციალურ სათავსოში
დანიაში, კერძო სახლის ბაღში, ვიკინგების ეპოქის განძი აღმოაჩინეს. ახალი ტერასისთვის ადგილის მომზადებისას ადგილობრივმა მცხოვრებმა დაახლოებით 700 ვერცხლის ნივთს მიაგნო, რომელთა საერთო წონა 18,5 კილოგრამია.
- განძი ჩრდილოეთ იუტლანდიაში, რებილეს მუნიციპალიტეტში იპოვეს. მამაკაცი, რომლის ვინაობაც გასაიდუმლოებულია, ბაღში სამუშაოებს ახალი ტერასის მოსაწყობად ასრულებდა. როგორც თავად იხსენებს, სამუშაოს დაწყებიდან დაახლოებით ნახევარ საათში "ნიჩაბი მყარ საგანს მოხვდა."
"ველოდი, რომ ბაღში საათობით შრომა მომიწევდა, მაგრამ ის, რაც აღმოვაჩინე, ჩემი ცხოვრების ყველაზე დიდი სიურპრიზი იყო“, - ამბობს კაცი.
არქეოლოგებისთვის აღმოჩენა განსაკუთრებით მნიშვნელოვანია არა მხოლოდ მასშტაბის, არამედ მისი შემადგენლობის გამოც. განძში ძირითადად ვერცხლის ზოდები და სამკაულებია, მონეტები კი შედარებით მცირე რაოდენობითაა.
"ეს ვიკინგების ეპოქის სეიფის პოვნას ჰგავს“, - განაცხადა მუზეუმის კულტურული მემკვიდრეობისა და არქეოლოგიის დეპარტამენტის ხელმძღვანელმა ტორბენ სარაუმ. მისი შეფასებით, ზოდების ჭურჭელში განლაგებაც საინტერესო ინფორმაციას იძლევა. მათი განთავსების წესი შესაძლოა მიუთითებდეს, რომ ისინი წონისა და შესაბამისად, ღირებულების მიხედვით იყო დალაგებული.
- აღმოჩენილ ნივთებს შორის არის როგორც არაბული, ასევე ანგლო-საქსური მონეტები. ეს არქეოლოგების შეფასებით, კიდევ ერთი დასტურია იმისა, რომ X საუკუნეში დღევანდელი დანიის ტერიტორია ფართო სავაჭრო და კულტურული ქსელის ნაწილი იყო.
ინგლისური მონეტები მეფე ედუარდ უფროსის მეფობის პერიოდს, 899-924 წლებს მიეკუთვნება. არაბული მონეტები კი X საუკუნეში იყო მიმოქცევაში. სწორედ ამიტომ, მეცნიერები აღმოჩენილ მონეტებსა და ნივთებს დაახლოებით X საუკუნით ათარიღებენ.
მასშტაბით ეს დანიაში აღმოჩენილი ვიკინგების ეპოქის ყველაზე დიდი ვერცხლის განძია. მისი წონა 18,5 კილოგრამს შეადგენს.
განძი ამჟამად დანიის ეროვნულ მუზეუმშია გადატანილი. მოსალოდნელია, რომ ის სახელმწიფო საკუთრებად გამოცხადდება და მომავალში ერთ-ერთ მუზეუმში გამოიფინება