ფრანგმა მეცნიერმა აღიარა, რომ ძეხვის ფოტო ჯეიმს ვების ტელესკოპით გადაღებულ კოსმოსურ გამოსახულებად გაასაღა
ფრანგმა ფიზიკოსმა ეტიენ კლაინმა სოციალურ ქსელში ძეხვის ნაჭრის ფოტო გამოაქვეყნა და ხუმრობით დაწერა, რომ ის მზესთან უახლოესი ვარსკვლავის, პროქსიმა კენტავრის, გამოსახულება იყო, რომელიც ჯეიმს ვების კოსმოსურმა ტელესკოპმა გადაიღო.
- კლაინმა ფოტოს Twitter-ზე გამოქვეყნებისას დაწერა, რომ ვარსკვლავი დედამიწიდან 4.2 სინათლის წლის მანძილზე მდებარეობს და გამოსახულებაზე "დეტალების დონე“ განსაკუთრებით შთამბეჭდავია.
პოსტს ათასობით ადამიანი გამოეხმაურა და ბევრმა მისი ნათქვამი დაიჯერა. მოგვიანებით მეცნიერმა თავად გაამხილა, რომ ფოტოზე სინამდვილეში ესპანური ჩორიზოს ძეხვის ნაჭერი იყო, რომელიც შავ ფონზე, ძალიან ახლო ხედით გადაიღო.
კლაინმა განმარტა, რომ მისი მიზანი ადამიანებისთვის იმის ჩვენება იყო, თუ რამდენად მარტივია ინტერნეტში გავრცელებული ინფორმაციისა და ფოტოების დაუფიქრებლად დაჯერება.
"გარკვეული კომენტარების გათვალისწინებით, ვალდებულად ვთვლი დავაზუსტო, რომ პროქსიმა კენტავრის სავარაუდო სურათის ამსახველი ტვიტი ხუმრობა იყო“, - დაწერა მან.