"ქვეყანაში ძალიან ცუდი სიტუაციაა და კიდევ უფრო გაუარესდება" - რას წერს გასტროენტეროლოგი ჯაბა ზარქუა ექიმ მაია კოხტაშვილის საქმეზე?
"ამ ამბავს სერიოზული დისკუსია უნდა მოყვეს სხვადასხვა მიმართულებით" - ექიმი გასტროენტეროლოგი ჯაბა ზარქუა სოციალურ ქსელში ექიმ მაია კოხტაშვილის საქმეს ეხმაურება.
- მისი თქმით, "ეს ამბავი იმის გამო ხდება, რომ მთავრობა ნარკოპოლიტიკით "დაკავდა".
"დადასტურდა აგენტ-პროვოკატორის ამბავი.
ისტორია ასეთია - ლიცენზირებულ ნევროლოგს მიუგზავნეს პაციენტად უწყების თანამშრომელი და დაიჭირეს "გაბაპენტინის" გამოწერაზე! ნევროლოგი… "გაბაპენტინზე"… ბოროტი სისულელე ქვია ამ ისტორიას, სხვა ეპითეტი არ მაფიქრდება.
ამ ამბავს სერიოზული დისკუსია უნდა მოყვეს სხვადასხვა მიმართულებით, ჩემი აზრით.
1. ტკივილის მართვა
ქვეყანაში ძალიან ცუდი სიტუაციაა ამ კუთხით და ეს სიტუაცია კიდევ უფრო გაუარესდება. სააფთიაქო ნარკომანიასთან ბრძოლის ეგიდით, ჩვენი ბებიები და ბაბუები არიან დარჩენილი "პრეგაბალინის" და სხვა მსგავსი წამლების გარეშე ან თუ ყიდულობენ - ძალიან მაღალ ფასში. მაღალი ფასი გამოიწვია ბაზარში მთავრობის უხეშმა ჩარევამ, ეკონომისტი არ გჭირდებათ ამისთვის, უბანში შეგიძლიათ გახვიდეთ და "ლირიკის" ფასების დინამიკას ზუსტად მოგახსენებენ ბიჭები.
2. ნარკოპოლიტიკა
ეს ამბავი ხდება იმის გამო, რომ მთავრობა "დაკავდა" ნარკოპოლიტიკით. რა გამოიწვია ამან, ვხედავთ. ამ დარგში მომუშავე კოლეგები გვაფრთხილებენ, რომ სიტუაცია ამ დინამიკით უარესი გახდება მხოლოდ. ნარკოპოლიტიკა უნდა გადაიხედოს. რაც არის - საშინლად მუშაობს. მომხმარებელი მაინც არ მცირდება და მსგავსი “კოლატერალური ზიანი” კი იმატებს.
3. ექიმების შემოწმების მექანიზმის შემუშავება
კამერამიმაგრებული აგენტით ექიმის შემოწმება არის ისეთი უკიდურესი აუცილებლობა, რომ რავი, ერთ ტონა "კოკაინს" თუ არ ამოიღებენ შემოწმების შედეგად ან იმას, რასაც თავისი ჩინოვნიკების სახლიდან იღებენ, ისე ეს დაუშვებელია. რატომ? იმიტომ, რომ გამოიწვევს ექიმების გადასვლას თავდაცვით რეჟიმში, რაშიც დღეს ისედაც არიან მოწყვლადი ექიმები. თავდაცვის რეჟიმში მყოფი ექიმი კი პაციენტის დახმარების ნაცვლად, იმაზე ფიქრობს, რომ რამე შარში არ გაეხვეს. ამ მიდგომით პაციენტის დახმარება შეუძლებელია" - წერს ჯაბა ზარქუა.
- ცნობისთვის, ყალბი რეცეპტის გაცემაში ბრალდებულმა ექიმმა მაია კოხტაშვილმა, რომელსაც სასამართლომ 50 000-ლარიანი საპატიმრო გირაო შეუფარდა, საპატირო დატოვა. კოხტაშვილი მას შემდეგ გათავისუფლდა, რაც გირაო გადაიხადეს. გირაოს თანხა სოციალურ ქსელში წამოწყებული კამპანიის მეშვეობით მოქალაქეებმა შეაგროვეს.
მაია კოხტაშვილს ბრალი საქართველოს სისხლის სამართლის კოდექსის 268-ე მუხლის მე-2 ნაწილით წარუდგინეს, მას ედავებიან, რომ სამსახურებრივი მდგომარეობის გამოყენებით, მოქალაქეს ფსიქოტროპული ნივთიერების შესაძენად უკანონოდ დაუმზადა და გასცა ყალბი რეცეპტი. აღნიშნული ქმედება სასჯელის სახედ და ზომად 3-დან 6 წლამდე ვადით თავისუფლების აღკვეთას ითვალისწინებს.
ასევე იხილეთ: