“ნამახვანჰესის ისტორია ყველაზე კარგი დასტურია, რომ “გამჭვირვალობის კანონი“ არის ყველაზე ქართული კანონი“ - შალვა პაპუაშვილი
“ნამახვანჰესის ისტორია არის ყველაზე კარგი დასტური იმისა, რომ გამჭვირვალობის კანონი არის ყველაზე ქართული კანონი, რაც კი შეიძლება მიიღო პარლამენტმა ბოლო წლების განმავლობაში, ვინაიდან ქართულ ინტერესებს ემსახურება - რაც ჩაიდინეს ბრიუსელიდან დაფინანსებულმა ხალხმა და ჩაშალეს ყველაზე მნიშვნელოვანი ენერგეტიკული პროექტი, ასეთი მავნებლობა ვეღარ მოხდება“, - ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან საუბრისას განაცხადა, რითაც უპასუხა შეკითხვას, რომელიც აშშ-ში “ფარას“ გამკაცრებულ რეგულაციებს შეეხებოდა.
- მისი თქმით, თანამედროვე სამყაროში სულ უფრო მზარდია ერთი ქვეყნიდან მეორე ქვეყნის შიდა საქმეებში ჩარევა ჰიბრიდული მეთოდებით.
“ეს არის კიდევ ერთი დადასტურება იმ ჭეშმარიტებისა, რაც ისედაც ხელის გულზე დევს, რომ თანამედროვე სამყაროში სულ უფრო მზარდია ერთი ქვეყნიდან მეორე ქვეყნის შიდა საქმეებში ჩარევა ჰიბრიდული მეთოდებით და ამგვარ მეთოდებში შედის მათ შორის დაფინანსება ერთი ქვეყნის, ან პოლიტიკური ჯგუფის მხრიდან მეორე ქვეყანაში საკუთარი ინტერესების გატარებისა. ასე რომ, ეს ყველაზე ადრე დაინახა აშშ-მა, ჯერ კიდევ რამდენიმე ათეული წლის წინ და მოაწესრიგეს FARA-ს კანონით, რომ ნებისმიერი დაფინანსება, რომლის მიზანი პოლიტიკაზე თუ საზოგადოებრივ საკითხებზე გავლენის მოხდება, გამჭვირვალე უნდა იყოს.
ეს არის ჭეშმარიტება, რომლის შემოტრიალება სცადა ბრიუსელმა და სხვათა შორის აშშ-ის წინა ადმინისტრაციამაც. აშშ-ის ყოფილმა ელჩმა აბსოლუტურად ყალბი კამპანია აწარმოვა და შეგახსენებთ, რომ ყველაზე ქართულ კანონს, ქალბატონმა დეგნანმა დაარქვა “რუსული კანონი“ და ეს პროპაგანდისტული ნარატივი მათივე დაფინანსებული NGO-ების საშუალებით სცადეს, რომ საზოგადოებაში დაემკვიდრებინათ. მაგრამ ნახეთ, საბოლოო ჯამში საზოგადოებამ რა პასუხიც გასცა ამ ყალბ ნარატივს. ჩვენ 2024 წელს მივიღეთ ყველა შესაბამისი კანონმდებლობა და ასე გავედით არჩევნებზე. ეს არჩევნები, რომლებიც თავად გამოაცხადეს რეფერენდუმად, ამ რეფერენდუმზე ქართველმა ხალხმა, მილიონ ას ოცი ათასმა ადამიანმა მხარი დაუჭირა ყველა ამ კანონს, რომელიც ემსახურება ქართველი ხალხის ინტერესებს.
ამ დღეებში შეგვახსენეს ნამახვანჰესის თემა, სადაც ჯერ კიდევ მიმდინარეობს სასამართლო პროცესები და არის რისკი, რომ 400 მლნ დოლარი დაეკისროს საქართველოს, კომპანიის სასარგებლოდ, რომელიც ფაქტობრივად აქედან გააგდო უცხოეთიდან დაფინანსებულმა აგენტურამ. გარდა იმისა, რომ საქართველომ მიიღო ზიანი, რომ ეს მნიშვნელოვანი ენერგეტიკული პროექტი არ განხორციელდა, დამატებით საქართველოს ბიუჯეტიდან შეიძლება მიგვიწიოს ანაზღაურება იმ ზიანისა, რომელიც მიაყენეს მათ უცხოურმა დაფინანსებულმა ორგანიზაციებმა.
ამ კამპანიას მაშინ კურირებდა სამი არასამთავრობო ორგანიზაცია - “მწვანე ალტერნატივა“, “სოციალური სამართლიანობის ცენტრი“ და საია. სამივე დაფინანსებული იყო ბრიუსელიდან და რამდენიმე სხვა წყაროდან. დღეს ყველამ იცის, რომ იყო აბსოლუტური ფარსი რაც მოაწყვეს მაშინ, რათა ერთ-ერთი მნიშვნელოვანი ენერგეტიკული პროექტი ჩაშლილიყო. ასე რომ, ნამახვანჰესის ისტორია არის ყველაზე კარგი დასტური იმისა, რომ გამჭვირვალობის კანონი არის ყველაზე ქართული კანონი, რაც კი შეიძლება მიიღო პარლამენტმა ბოლო წლების განმავლობაში, ვინაიდან ქართულ ინტერესებს ემსახურება. რაც ჩაიდინეს ბრიუსელიდან დაფინანსებულმა ხალხმა და ჩაშალეს ყველაზე მნიშვნელოვანი ენერგეტიკული პროექტი, ასეთი მავნებლობა ვეღარ მოხდება“, - აღნიშნა შალვა პაპუაშვილმა.