"ეს კატასტროფული შედეგია" - არჩევნები გერმანიაში: რა ხდება ქვეყანაში, რას აცხადებს კანცლერი მერცი და როგორ გადანაწილდა ხმები
გერმანიის კანცლერმა ფრიდრიხ მერცმა განაცხადა, რომ თანამდებობის დატოვებას არ აპირებს, მიუხედავად იმისა, რომ მისმა პარტიამ, ქრისტიან-დემოკრატიულმა კავშირმა (CDU), ორ რეგიონულ არჩევნებში ცუდი შედეგი აჩვენა.
- მერცმა CDU-ს შედეგებს "კატასტროფა“ უწოდა, თუმცა აღნიშნა, რომ მუშაობას გააგრძელებს და მთავრობის მიერ დაგეგმილ ეკონომიკურ, საგადასახადო და სოციალურ რეფორმებს განახორციელებს.
პარტიამ ხმების მხოლოდ 4.9% მიიღო და 5%-იან ბარიერს მიღმა დარჩა. ეს CDU-სთვის 1949 წლის შემდეგ რეგიონულ არჩევნებში ყველაზე ცუდი შედეგია.
ამავე არჩევნებში პირველი ადგილი "ალტერნატივა გერმანიისთვის“ (AfD) დაიკავა 38.3%-ით, მეორე ადგილზე კი სოციალ-დემოკრატიული პარტია (SPD) გავიდა 35.4%-ით.
CDU-მ მხარდაჭერა დაკარგა ბერლინშიც, სადაც არჩევნებში "მემარცხენეებმა“ (Die Linke) გაიმარჯვეს. პარტიამ ხმების 25.3% მიიღო.
-
არჩევნების შემდეგ მერცმა განაცხადა, რომ მიღებული შედეგი მისთვის მთავრობის კურსის შეცვლის მიზეზი არ არის.
"რეფორმები აუცილებლად უნდა განხორციელდეს. მე ვიღებ ამ პასუხისმგებლობას, რადგან მსურს ჩვენი ქვეყნის წინსვლა“, - განაცხადა გერმანიის კანცლერმა.
- არჩევნების წინ გერმანულ პოლიტიკაში აქტიურად განიხილავდნენ მერცის შესაძლო შეცვლის საკითხსაც, თუმცა კანცლერმა თანამდებობის დატოვება გამორიცხა და განაცხადა, რომ ქვეყნის ეკონომიკური და სოციალური პრობლემების მოსაგვარებლად დაწყებულ რეფორმებზე მუშაობას გააგრძელებს.
"ის, რაც ახლა უნდა გაკეთდეს, მოითხოვს სიმტკიცეს, მოთმინებასა და პასუხისმგებლობას. ამას ვაჩვენებ, როგორც CDU-ის თავმჯდომარე და, უპირველეს ყოვლისა, როგორც ჩვენი ქვეყნის კანცლერი“, - თქვა მერცმა.
- ცნობისთვის, მეკლენბურგ-წინა პომერანიის მხარის საპარლამენტო არჩევნებში ულტრამემარჯვენე პარტიამ, "ალტერნატივა გერმანიისთვის“ (AfD), გაიმარჯვა, - ინფორმაციას Deutsche Welle საარჩევნო კომისიაზე დაყრდნობით ავრცელებს.
საარჩევნო კომისიის მიერ დღეს დილით გამოცხადებული წინასწარი შედეგების თანახმად, კვირას გამართულ არჩევნებში AfD-მ ხმების 38,2% მიიღო. “სოციალ-დემოკრატიულმა პარტიამ” (SPD) კი, რომელსაც მხარის პრემიერ-მინისტრი მანუელა შვეზიგი ხელმძღვანელობს, ხმების 35.5% მოიპოვა.
წინასწარი შედეგების თანახმად, მხარის პარლამენტში მოხვედრა კიდევ ორმა პარტიამ შეძლო: სოციალისტურმა "მემარცხენე პარტიამ“ (6.5%) და "მწვანეთა პარტიამ“ (5.7%).
Deutsche Welle წერს, რომ კანცლერ ფრიდრიხ მერცის “ქრისტიან-დემკრატიულმა კავშირმა” (CDU) კატასტროფული მარცხი განიცადა და პარლამენტში ადგილის მოპოვება ვერ შეძლო, რადგან არჩევნებში ხმების მხოლოდ 4.9% მიიღო.
ამ დროისთვის არსებული მონაცემებით, მხარის ახალ პარლამენტში "ალტერნატივა გერმანიისთვის“ 32 მანდატს მოიპოვებს, “სოციალ-დემოკრატიული პარტია” - 29-ს, "მემარცხენე პარტია“ და "მწვანეები“ კი - ხუთ-ხუთს.
ამასთან, წინასწარი შედეგებით, ბერლინში "მემარცხენე პარტიამ“ ხმების 25.3% მიიღო, “ქრისტიან-დემკრატიულმა კავშირმა” - 19%, პარტიამ "ალტერნატივა გერმანიისთვის“ - 16%, “სოციალ-დემოკრატიულმა პარტიამ” - 12.1%.
რაც შეეხება გერმანიის სხვა მხარეებში წელს გამართულ არჩევნებს, მარტში ბადენ-ვიურტემბერგის მხარეში "მწვანეთა“ პარტიამ გაიმარჯვა, ასევე მარტში, რაინლანდ-პფალცში გამართულ არჩევნებში კანცლერ ფრიდრიხ მერცის “ქრისტიან-დემოკრატიულმა კავშირმა” გაიმარჯვა, ამასთან 6 სექტემბერს საქსონია-ანჰალტშის მხარეში გამართულ არჩევნებში გამარჯვება მოიპოვა პარტიამ "ალტერნატივა გერმანიისთვის“ (AfD).