ICE-ის აგენტმა DoorDash-ის მიგრანტი მძღოლი დაჭრა და დააკავა - ტეხასში პროტესტის ახალმა ტალღამ იფეთქა
ტეხასის შტატის დედაქალაქ ოსტინში აშშ-ის საიმიგრაციო და საბაჟო სამსახურის (ICE) აგენტმა მამაკაცი დაჭრა, რასაც ადგილზე საპროტესტო აქციები მოჰყვა. დაჭრილი 28 წლის ვენესუელელი DoorDash-ის კურიერი, ვილბერ რაფაელ გარსეს პერესია. ადვოკატის ცნობით, მას ტყვია ტორსის არეში მოხვდა და იგი საავადმყოფოში გადაიყვანეს.
აშშ-ის შიდა უსაფრთხოების დეპარტამენტმა BBC-ს განუცხადა, რომ ოსტინში მომხდარ სროლას იძიებს, სადაც დაჭრილი პირი ქვეყანაში უკანონოდ იმყოფებოდა. ჯერჯერობით უცნობია, რამ გამოიწვია სროლა. ქალაქის მერმა და ადგილობრივმა პოლიციამ დამოუკიდებელი გამოძიება მოითხოვეს. ეს შემთხვევა რამდენიმე თვეში მოჰყვა ჰიუსტონში მომხდარ ინციდენტს, სადაც ICE-ის ოფიცერმა მამაკაცი მოკლა.
დაჭრილის ადვოკატმა კეიტ ლინკოლნ-გოლდფინჩმა CBS-ს განუცხადა, რომ გარსეს პერესმა საავადმყოფოდან მეუღლეს დაურეკა, რა დროსაც იგი ტკივილისგან ყვიროდა. მან ასევე აღნიშნა, რომ დაჭრილი ამჟამად ICE-ის პატიმრობაში იმყოფება.
ინციდენტი კვირას, ადგილობრივი დროით დაახლოებით 13:00 საათამდე მოხდა. სროლის ადგილზე ათობით დემონსტრანტი შეგროვდა, რომელთაგან ზოგიერთი მექსიკისა და გვატემალას დროშებს აფრიალებდა და ICE-ისგან ოსტინის დატოვებას ითხოვდა. აქციის მონაწილეები შეგროვდნენ ლურჯი Toyota Corolla-ს მახლობლად, რომელსაც მგზავრის მხარეს კარი ჰქონდა დაზიანებული, იქვე კი ICE-ის აგენტები იდგნენ.
ტეხასში საიმიგრაციო კონტროლი და დაპატიმრებები ტრამპის ადმინისტრაციის მეორე ვადის განმავლობაში მკვეთრად გაიზარდა, რამაც აშშ-ის რამდენიმე ქალაქში არეულობა გამოიწვია. თეთრი სახლის ადმინისტრაცია თავის პოლიტიკასა და სააგენტოს ტაქტიკას საზოგადოებრივი უსაფრთხოებითა და საზღვრის დაცვისა თუ მასობრივი დეპორტაციის დაპირებებით ამართლებს.
ოსტინის დემოკრატმა მერმა კირკ უოტსონმა განაცხადა, რომ ოსტინის მცხოვრებლებს აქვთ უფლება იცოდნენ სიმართლე და თავი უსაფრთხოდ იგრძნონ. მან აღნიშნა, რომ ქალაქი ჩართული იქნება გამოძიებაში და დასძინა, რომ ბოლო კვირებში ოსტინში ICE-ის ოპერაციები მკვეთრად გაიზარდა.