დაღუპულები და დაკარგულები, ასობით გაუქმებული რეისი, ელექტროენერგიის გარეშე დარჩენილი 50 000-ზე მეტი აბონენტი და მეწყრისგან განადგურებული დასახლებები - იაპონია დამანგრეველი სტიქიის შედეგებს ებრძვის

ძლიერმა ტაიფუნმა “დუჯუანმა“ ტოკიოსა და მის მიმდებარე პრეფექტურებს კოკისპირული წვიმები და დამანგრეველი ქარი დაატეხა თავს, რასაც სულ მცირე 4 ადამიანის სიცოცხლე ემსხვერპლა. სტიქიის გამო ელექტროენერგიის გარეშე დარჩა 50 000-ზე მეტი ადამიანი, ხოლო ასობით ავიარეისი გაუქმდა.

სტიქიის პიკის დროს, ორშაბათს, ხელისუფლებამ მოსახლეობა მოსალოდნელი საფრთხის შესახებ გააფრთხილა და 1.9 მილიონ ადამიანს თავშესაფრებში გადასვლისკენ მოუწოდა. დაღუპვის შემთხვევები კანაგავასა და ჩიბას პრეფექტურებში ჩამოწოლილ მეწყრებს უკავშირდება, ხოლო კიდევ 6 ადამიანი დაკარგულად ითვლება. ტაიფუნის დროს ქარის სიჩქარე 130 კმ/სთ-ს შეადგენდა, ხოლო ამოვარდნილობები 194 კმ/სთ-ს აღწევდა.

კანაგავას პრეფექტურაში, იოკოსუკას სახანძრო სამსახურის ცნობით, 60-იან წლებში მყოფი ქალი საკუთარ სახლში მეწყრის ჩამოწოლის შედეგად ცოცხლად დაიმარხა. სამაშველო ჯგუფების მიერ ჩატარებული საძიებო სამუშაოების შემდეგ იგი გარდაცვლილი იპოვეს. ჩიბას პრეფექტურაში, სოდეგაურაში, 50-იან წლებში მყოფი მამაკაცი მძიმე ტექნიკასთან ერთად ბამბუკის ტყეში გადავარდა, როდესაც მეწყრის ადგილზე გაწმენდით სამუშაოებს ატარებდა; იგი საავადმყოფოში გადაყვანის შემდეგ გარდაიცვალა.

• გაუქმებული ღონისძიებები და პრემიერ-მინისტრის ვიზიტი აშშ-ში

“დუჯუანი“ მიმდინარე წელს იაპონიაში დაფიქსირებული 25-ე ტაიფუნია. სტიქია ქვეყანაში 5-დღიანი უქმეების დროს განვითარდა, რის გამოც უამრავი ღონისძიება გაუქმდა. გაუქმდა Rock in Japan-ის მუსიკალური ფესტივალის ორშაბათის კონცერტები, ასევე შეწყდა ვიდეო თამაშების გამოფენის, Tokyo Game Show-ს პროგრამა.

იაპონიის პრემიერ-მინისტრმა სანაე ტაკაიჩიმ სოციალურ ქსელ X-ში გარდაცვლილთა ოჯახებს მიუსამძიმრა. მან აღნიშნა, რომ მინისტრთა კაბინეტს სრული მზადყოფნისკენ მოუწოდა, რის შემდეგაც აშშ-ში დაგეგმილ ვიზიტზე გაემგზავრა. იგი ნიუ-იორკში გაეროს გენერალურ ასამბლეაზე სიტყვით გამოვა და აშშ-ის პრეზიდენტ დონალდ ტრამპს შეხვდება.

მეცნიერთა განმარტებით, ტაიფუნის ასეთ სიმძლავრეს ხელი შეუწყო “სუპერ El Niño“-ს ფენომენმა, რომელმაც ოკეანე გაათბო და ძლიერი შტორმების წარმოქმნას შეუწყო ხელი. თბილი წყალი შტორმებს მეტ ენერგიას აძლევს, ხოლო დათბობილი ატმოსფერო მეტ ტენიანობას ინარჩუნებს, რაც კოკისპირულ წვიმებს იწვევს.

ტაიფუნი იაპონიის წყნარი ოკეანის სანაპიროზე ჩრდილოეთის მიმართულებით გადაადგილებას აგრძელებს, ხოლო ზარალის სრული მასშტაბი მოგვიანებით გახდება ცნობილი.

წყარო