გერმანიაში ქალმა ყოფილი ბოიფრენდის შვილს საწამლავით გაჟღენთილი შოკოლადები გაუგზავნა - სკანდალური საქმის დეტალები
ჰამბურგში, 42 წლის ქალი ყოფილი პარტნიორის 20 წლის ვაჟისთვის მომაკვდინებელი შოკოლადების გაგზავნაშია ეჭვმიტანილი. ამანათში ტკბილეული იდო, რომლებიც, BILD-ის ინფორმაციით, უკიდურესად ტოქსიკური თალიუმის ნიტრატით იყო გაჯერებული. ახალგაზრდა კაცს გზავნილი საეჭვოდ მოეჩვენა და პოლიციას თავად შეატყობინა.
საქმეზე გამოძიება მკვლელობის მცდელობის მუხლით მიმდინარეობს.
ქალი საკუთარ სახლში დააკავეს
სამართალდამცავებმა 42 წლის ეჭვმიტანილი გასულ სამშაბათს, ჰამბურგში, საკუთარ საცხოვრებელში დააკავეს. მანამდე მკვლელობის განყოფილებამ და პროკურატურამ გამოძიება ჩაატარეს. სასამართლომ პროკურატურის მოთხოვნის საფუძველზე მისი დაკავების ორდერი და ჩხრეკის ნებართვაც გასცა.
დაკავებისას პოლიციამ შესაძლო მტკიცებულებები ამოიღო. ჩხრეკის დროს კი სახლში კიდევ ერთი, სავარაუდოდ, საშიში ნივთიერება აღმოაჩინეს, რის გამოც ადგილზე სახანძრო სამსახური გამოიძახეს.
აღმოჩენილი ნივთიერება სპეციალურ სახიფათო ტვირთის კონტეინერში მოათავსეს. სახანძრო სამსახურის თანამშრომლებს დამცავი ტანსაცმელი ეცვათ, რათა ნივთიერება უსაფრთხოდ გადაეტანათ.
BILD-ის ინფორმაციით, ნაპოვნი ნივთიერება თალიუმის ნიტრატია - ძალიან ტოქსიკური ქიმიური ნაერთი, რომელსაც ორგანიზმისთვის მძიმე ზიანის მიყენება შეუძლია.
ამ დროისთვის გამოძიება ადგენს, რა იყო ქალის მოტივი და რამდენად უკავშირდება მის სახლში აღმოჩენილი ნივთიერება მის წინააღმდეგ აღძრულ საქმეს.