"ჩემი გაზრდილივითაა... მისი წარმატება ჩემსაზე ალბათ ასჯერ მეტად გამიხარდება" - რას ამბობს ხვიჩა კვარაცხელია ძმის შესახებ
ეროვნული ნაკრების ფეისბუქ გვერდზე გამოქვეყნდა ვიდეო, სადაც ჩვენი გუნდის ვარსკვლავი ხვიჩა კვარაცხელია, ძმის, თორნიკეს შესახებ საუბრობს.
"საერთოდ, ვფიქრობ, რომ ძალიან ემოციური ადამიანი არ ვარ, ხანდახან მიჭირს ემოციების გამოხატვა, მაგრამ როცა მითხრეს, რომ ახალგაზრდული ნაკრები მოდიოდა, ძალიან გამიხარდა და ერთი სული მქონდა, როდის ვნახავდი თოკოს.
ჩემი გაზრდილივითაა და როცა დავინახე რომ ავტობუსით მოვიდა, უკვე პროფესიონალი ფეხბურთელია, რომელიც საქართველოს ახალგაზრდულ ნაკრებში თამაშობს, სიამაყით ავივსე.
ასეთ დროს ხვდები, რომ შენი ძმა სწორად შრომობს, სწორად აკეთებს რაღაცებს, მისი წარმატება ჩემსაზე ალბათ ასჯერ მეტად გამიხარდება. იმედი მაქვს, რომ საქართველოს ეყოლება ნიჭიერი ფეხბურთელი. ძალიან ამაყი ვარ ჩემი ძმით", - ამბობს ხვიჩა კვარაცხელია.