ძლიერი აფეთქება ათენში - არიან დაშავებულები: რა ინფორმაციას ავრცელებს ადგილობრივი მედია?
ათენის ცენტრში, აკროპოლისის მახლობლად, ძლიერი აფეთქების შედეგად ორსართულიანი საცხოვრებელი სახლი ჩამოინგრა, რის შედეგადაც სულ მცირე სამი ადამიანი დაშავდა. დაზიანდა მიმდებარე შენობები, მაღაზიები და ავტომობილები.
ინციდენტი პარასკევს დილით, ადგილობრივი დროით 07:30 საათზე, ტურისტულ უბან პლაკაში მოხდა. აფეთქებამ მე-20 საუკუნის შუა პერიოდის ორსართულიანი შენობის ფასადი მთლიანად ჩამოანგრია.
სახანძრო სამსახურის ცნობით, მეზობელი შენობიდან მაშველებმა ორი ქალი გამოიყვანეს და საავადმყოფოში გადაიყვანეს. გარდა ამისა, აფეთქების შედეგად დაშავდა ერთი გამვლელიც. მეზობელი შენობიდან გადარჩენილი ყველა პირი ტურისტი აღმოჩნდა.
ადგილზე 24 მეხანძრე-მაშველი ოპერატიულად დაირაზმა. პოლიციამ ტერიტორია უსაფრთხოების ლენტით შემოსაზღვრა, ხოლო სამაშველო ჯგუფები სპეციალურად გაწვრთნილი ძაღლებით ნანგრევებში შესაძლო მოყოლებული ადამიანების ძებნას რამდენიმე საათის განმავლობაში აგრძელებდნენ.
ადგილობრივი მცხოვრებლების თქმით, შენობის მეორე სართულზე ხანდაზმული წყვილი ცხოვრობდა, ხოლო მედიის ცნობით, შენობაში არსებულ დღიურად გაქირავებულ ბინაში შესაძლოა სამი ტურისტი იმყოფებოდა. ადგილობრივმა პასტორმა გიოტის კანტარძისმა აღნიშნა, რომ აფეთქების ტალღამ შენობის ყველა სართულზე მინები ჩაამსხვრია.
<blockquote class="twitter-tweet"><p lang="en" dir="ltr">Building explosion and collapse in Athens Greece today https://t.co/Kb0Kp8032W</p>— I, Christian (@i_christian__) <a href="https://x.com/i_christian__/status/2103356714489901245?ref_src=twsrc%5Etfw">September 25, 2026</a></blockquote>
<script async src="https://platform.x.com/widgets.js" charset="utf-8"></script>
აფეთქების ზუსტი მიზეზი ამ ეტაპზე უცნობია და გამოძიება მიმდინარეობს. თუმცა, ადგილობრივი მედიის ცნობით, პირველადი ვერსიით, ინციდენტი შესაძლოა ბუნებრივი აირის გაჟონვას გამოეწვია.