ცნობილი ფსიქოთერაპევტი ანატოლი კაშპიროვსკი 87 წლის ასაკში გარდაიცვალა
ანატოლი კაშპიროვსკი 87 წლის ასაკში გარდაიცვალა. ამის შესახებ ტელეწამყვანმა ანდრეი მალახოვმა განაცხადა.
- კაშპიროვსკის გარდაცვალების მიზეზად გულის უკმარისობა სახელდება. მანამდე მედიაში მისი ჯანმრთელობის მდგომარეობის შესახებ არაერთი ინფორმაცია გავრცელდა, მათ შორის ჰოსპიტალიზაციის შესახებ. ასევე ვრცელდებოდა ინფორმაცია, თითქოს მას ონკოლოგიური დაავადება ჰქონდა, თუმცა მისი წარმომადგენელი ამ ინფორმაციას არ ადასტურებდა.
კაშპიროვსკის მეუღლე გულიიზარ ჩალბაშოვაა. წყვილს გასულ წელს ქალიშვილი, ელინა, შეეძინა. პირველი ქორწინებიდან კაშპიროვსკის კიდევ ორი შვილი ჰყავს - ქალიშვილი ელენა და ვაჟი სერგეი.
- კაშპიროვსკი უმცროს ქალიშვილზე ხშირად საუბრობდა და ამბობდა, რომ მისი აღზრდა დიდ სიამოვნებას ანიჭებდა.
"მას უბრალოდ სურს, ცოტა ხნით მშვიდად იცხოვროს. იყოს ჩვეულებრივი ადამიანი და მზრუნველი მამაა. აქ არ არის საჭირო რაიმე საშინელი საიდუმლოს ან მძიმე დაავადების ძებნა“, - ამბობდა მისი წარმომადგენელი.
კაშპიროვსკის მეგობარმა ასევე ისაუბრა გავრცელებულ ინფორმაციაზე, თითქოს კაშპიროვსკის მეუღლემ ინ ვიტრო განაყოფიერებას მიმართა. მისი თქმით, ამის დადასტურება არ შეუძლია, თუმცა წყვილს შვილის ყოლა დიდი ხნის განმავლობაში სურდა და საბოლოოდ ქალიშვილი შეეძინათ.
ანატოლი კაშპიროვსკი საბჭოთა კავშირის ერთ-ერთი ყველაზე ცნობილი ფსიქოთერაპევტი იყო. განსაკუთრებული პოპულარობა მან 1980-იანი წლების ბოლოს მოიპოვა, როდესაც ცენტრალურ ტელევიზიაში მისი სამკურნალო სეანსები გადიოდა. გადაცემებს მილიონობით ადამიანი უყურებდა და კაშპიროვსკი საბჭოთა ეპოქის ერთ-ერთ ყველაზე ცნობილ სატელევიზიო სახედ იქცა.
მისი სეანსების დროს მაყურებლები ეკრანის წინ იკრიბებოდნენ და კაშპიროვსკის მეთოდებით სხვადასხვა დაავადებისგან განკურნებას ელოდნენ. მისი საქმიანობა წლების განმავლობაში როგორც დიდი ინტერესის, ისე დაპირისპირების მიზეზი იყო.