“ნუ აყრით ხალხს ნაცარს თვალებში, გაასაჯაროვეთ სრული ჩანაწერი ხმით, თავიდან ბოლომდე“ - მეუფე გიორგი ჯამდელიანი პატიმარ გიორგი დავითაძის შესახებ
“რაც დღეს პენიტენციურ სისტემაში ხდება, საზოგადოებას კითხვების დასმის სრულ უფლებას აძლევს - ნუ დააფარებენ ხელს სავარაუდო საზარელი დანაშაულის ჩამდენთ. ვინც არ უნდა იყოს ის, რა თანამდებობაც არ უნდა ეკავოს და რომელ უწყებასაც არ უნდა წარმოადგენდეს, თუ ეს არაადამიანური დანაშაული ჩაიდინა, პასუხი უნდა აგოს“, - ამის შესახებ მარნეულისა და ჰუჯაბის ეპისკოპოსი გიორგი ჯამდელიანი სოციალურ ქსელში წერს.
- ეპისკოპოსის განცხადებით, 2012 წლის გამოცდილებამ ძალიან კარგად გვაჩვენა, რა შედეგამდე შეიძლება მიგვიყვანოს, როდესაც ძალადობისა და დანაშაულის შესახებ სიმართლის ნაცვლად საზოგადოებას მხოლოდ “ოფიციალურ” ვერსიებს აწვდიან.
“ქრისტიანული სარწმუნოება გვასწავლის, რომ სიმართლე არ შეიძლება დაიმალოს ძალაუფლების, შიშის ან სისტემის დაცვის გამო. ადამიანის სიცოცხლე და ღირსება ღვთის წინაშე ყველაზე დიდი ფასეულობებია, ხოლო ჩადენილ უსამართლობაზე დუმილი თავადაც მძიმე პასუხისმგებლობაა.
2012 წლამდე ბევრ მეგობარს საკუთარი ხელით დავუხუჭე თვალები, წინა ხელისუფლების რეჟიმის მსხვერპლებს. ამიტომ განსაკუთრებით კარგად ვიცი, რას ნიშნავს, როცა სახელმწიფოში ადამიანის სიცოცხლესა და ღირსებაზე მაღლა დგება სისტემის დაცვა და სიმართლის დამალვა.
სწორედ ამიტომ, რაც დღეს პენიტენციურ სისტემაში ხდება, საზოგადოებას კითხვების დასმის სრულ უფლებას აძლევს.
პენიტენციური სამსახური უარყოფს პატიმრის თითით გაუპატიურების ფაქტს. ოჯახი და საზოგადოება კი ითხოვს ძალიან მარტივ რამეს, გასაჯაროვდეს სრული ვიდეოჩანაწერი, ხმის თანხლებით, თავიდან ბოლომდე, რათა საზოგადოებამ თავად ნახოს და მოისმინოს, რა მოხდა სინამდვილეში.
და თუ პატიმრებმა ხმაური ატეხეს, საზოგადოებას უნდა აუხსნან რეალური მიზეზი. ეს არ ყოფილა “ცუდი სიზმრის ნახვის“ გამო ატეხილი ხმაური, როგორც ახლა ცდილობენ ამის წარმოჩენას. საუბარია პატიმრების სოლიდარობის და პროტესტის უკიდურესი ფორმით გამოხატვაზე. თუ სწორედ ამის შემდეგ მოხდა ბადრაგის მხრიდან პატიმრების ცემა, ეს ფაქტიც აუცილებლად უნდა დადგინდეს და გამოძიებულ იქნეს.
2012 წლის გამოცდილებამ ძალიან კარგად გვაჩვენა, რა შედეგამდე შეიძლება მიგვიყვანოს, როდესაც ძალადობისა და დანაშაულის შესახებ სიმართლის ნაცვლად საზოგადოებას მხოლოდ “ოფიციალურ” ვერსიებს აწვდიან.
ამიტომ დღეს განსაკუთრებით მნიშვნელოვანია ერთი რამ - ნუ დააფარებენ ხელს სავარაუდო საზარელი დანაშაულის ჩამდენთ. ვინც არ უნდა იყოს ის, რა თანამდებობაც არ უნდა ეკავოს და რომელ უწყებასაც არ უნდა წარმოადგენდეს, თუ ეს არაადამიანური დანაშაული ჩაიდინა, პასუხი უნდა აგოს.
ეს არ არის პოლიტიკური ანგარიშსწორების საკითხი. ეს არის ადამიანის ფუნდამენტური უფლების - ღირსების, სიცოცხლისა და კანონის წინაშე თანასწორობის საკითხი.
ერთხელ და სამუდამოდ უნდა დაესვას წერტილი ამ ქვეყანაში ასეთ სისაძაგლეებს.
ნუ აყრით ხალხს ნაცარს თვალებში. ნუ გვიყვებით “ცუდი სიზმრების“ ისტორიებს.
გაასაჯაროვეთ სრული ჩანაწერი ხმით, თავიდან ბოლომდე და საზოგადოებამ თავად ნახოს, რა მოხდა.
ჩვენ უკვე ერთხელ ვნახეთ, რა ფასად შეიძლება დაუჯდეს ქვეყანას სიმართლის დამალვა და ხელისუფლებამ იგივე შეცდომები არ უნდა გაიმეოროს”, - წერს ეპისკოპოსი გიორგი ჯამდელიანი.
ცნობისთვის, მსჯავრდებული გიორგი დავითაძის მიერ თბილისის სააპელაციო სასამართლოში გაკეთებული განცხადების მიხედვით, ის N6 პენიტენციური დაწესებულების ბადრაგს გაუპატიურებაში ადანაშაულებს. მისივე თქმით, აღნიშნული დეესკალაციის ოთახში განხორციელდა, მასში რამდენიმე პირი მონაწილეობდა და მისი მტკიცებით, “ყველაფერი კამერებში ჩანს“.
საკითხს გამოეხმაურა სპეციალური პენიტენციური სამსახურიც და აღნიშნულს დეზინფორმაცია უწოდა. პენიტენციური სამსახურის მტკიცებით, დავითაძის მიმართ “არათუ სექსუალური, არამედ არანაირი სახის ძალადობას არ ჰქონია ადგილი“.