გარდაიცვალა პიონერი პროგრამისტი, ქალი, რომლის მიერ შექმნილმა პროგრამულმა უზრუნველყოფამ "აპოლო 11“-ის მთვარეზე დაშვება გახადა შესაძლებელი
კომპიუტერული ტექნოლოგიების პიონერი და პროგრამისტი მარგარეტ ჰამილტონი 90 წლის ასაკში გარდაიცვალა. ამის შესახებ ინფორმაცია მასაჩუსეტსის ტექნოლოგიურმა ინსტიტუტმა (MIT) გაავრცელა.
ჰამილტონის მიერ შექმნილმა პროგრამულმა უზრუნველყოფამ მნიშვნელოვანი როლი შეასრულა Apollo 11-ის მისიაში, რომლის დროსაც ადამიანი პირველად დაეშვა მთვარეზე.
მარგარეტის კარიერის ერთ-ერთი ყველაზე მნიშვნელოვანი ეტაპი მაშინ დაიწყო, როდესაც MIT-მა NASA-სგან Apollo-ს კოსმოსური ხომალდებისთვის ფრენის პროგრამული უზრუნველყოფის შექმნის დავალება მიიღო. ჰამილტონი პროექტს შეუერთდა და საბოლოოდ, იმ გუნდის ხელმძღვანელი გახდა, რომელიც Apollo-ს ბორტკომპიუტერის პროგრამულ უზრუნველყოფაზე მუშაობდა.
"მომხიბლა როგორც თავად იდეამ, ასევე იმ ფაქტმა, რომ ეს აქამდე არასდროს გაკეთებულა. ვიყავი პირველი პროგრამისტი, ვინც შეუერთდა გუნდს და პირველი ქალი, რომელმაც მათთან ერთად იმუშავა“, - იხსენებდა ჰამილტონი.
- მისი პროგრამის მნიშვნელობა განსაკუთრებით 1969 წლის 20 ივლისს გამოჩნდა, როდესაც Apollo 11 მთვარეზე დაშვებას ცდილობდა.
დაშვებამდე რამდენიმე წუთით ადრე ხომალდის ბორტკომპიუტერმა განგაშის სიგნალი გამოსცა. კომპიუტერი ზედმეტი მონაცემებით გადაიტვირთა და დაშვების შეწყვეტის საფრთხე გაჩნდა. თუმცა ჰამილტონის მიერ შექმნილმა პროგრამამ პრობლემის აღმოჩენა და სისტემის პრიორიტეტების სწორად გადანაწილება შეძლო.
კომპიუტერმა ყველაზე მნიშვნელოვანი დავალებების შესრულება გააგრძელა და Apollo 11-მა დაშვება წარმატებით დაასრულა. სწორედ ამან მისცა ასტრონავტებს შესაძლებლობა, ისტორიული მისია ბოლომდე მიეყვანათ.
2016 წელს აშშ-ის მაშინდელმა პრეზიდენტმა ბარაკ ობამამ მას თავისუფლების საპრეზიდენტო მედალი გადასცა.
"ჩვენს ასტრონავტებს დიდი დრო არ ჰქონდათ, მაგრამ საბედნიეროდ, მათ მარგარეტ ჰამილტონი ჰყავდათ“, - განაცხადა ობამამ დაჯილდოების ცერემონიაზე.