ხოფაში, სატვირთო მანქანების სადგომზე მეწყერი ჩამოწვა - დაიღუპა 1 ადამიანი
თურქეთში, ხოფაში, სატვირთო მანქანების სადგომზე მეწყერი ჩამოწვა, რასაც ერთი ადამიანი ემსხვერპლა. ინფორმაციას CNN-ის თურქული ბიურო აქვეყნებს.
- შემთხვევა დილით, შავი ზღვის სანაპირო გზაზე, იმ ადგილას მოხდა, სადაც სატვირთო მანქანების ავტოპარკია. მთის ფერდობიდან დიდი და პატარა ზომის ქვები მოწყდა და სადგომზე გაჩერებულ მანქანებს დაეცა. ჩამოშლილმა კლდეებმა რამდენიმე სატვირთო დააზიანა, ერთი კი გადაბრუნდა.
მეწყრის დროს კლდეების ქვეშ 45 წლის ქასიმ ტოპალოღლუ მოჰყვა. შემთხვევის ადგილზე მისულმა სამაშველო და სამედიცინო ჯგუფებმა მისი გადარჩენა ვეღარ შეძლეს.
ადგილზე AFAD-ის, სახანძრო სამსახურის, პოლიციის და სასწრაფო დახმარების ჯგუფები მუშაობდნენ. ტერიტორიაზე ახალი მეწყრის ჩამოწოლის საფრთხის გამო დამატებითი უსაფრთხოების ზომებიც მიიღეს.
ამ დროისთვის სატვირთო მანქანების სადგომზე სამძებრო-სამაშველო სამუშაოები და ჩამოშლილი კლდეებისგან ტერიტორიის გაწმენდა მიმდინარეობს.