რა იმალება ჯონათანის ხანგრძლივი სიცოცხლის საიდუმლოს მიღმა - მსოფლიოში ყველაზე ხანდაზმული კუს გენები, შესაძლოა, მეცნიერებს დაბერების პროცესის ამოხსნაში დაეხმაროს
მსოფლიოში ყველაზე ხანდაზმული ხმელეთის ცხოველის, კუ - ჯონათანის, გენეტიკური კვლევა, შესაძლოა, მეცნიერებს ხანგრძლივი სიცოცხლის საიდუმლოს ამოხსნაში დაეხმაროს. მკვლევრების აზრით, ეს აღმოჩენა შეიძლება მნიშვნელოვანი იყოს ადამიანებში დაბერების პროცესის შესასწავლად და ასაკთან დაკავშირებული უჯრედული დაზიანების შესანელებელი მკურნალობის მეთოდების შესაქმნელად.
ჯონათანი ალდაბრას გიგანტური კუა, რომელიც დაახლოებით 194 წლისაა. ის სამხრეთ ატლანტიკის ოკეანეში მდებარე წმინდა ელენეს კუნძულზე ცხოვრობს. მისი ზუსტი ასაკი უცნობია, თუმცა 1882 წლის ფოტოზე კუ უკვე ზრდასრულია.
ჟურნალ Science Advances-ში გამოქვეყნებული კვლევის ფარგლებში, მეცნიერებმა ჯონათანის გენომი - დნმ-ის სრული ნაკრები - შეისწავლეს. მათ აღმოაჩინეს 287 გენის ვარიანტი, რომლებიც შესაძლოა უჯრედების დაზიანებისგან დაცვასა და დაბერების პროცესის შენელებას უკავშირდებოდეს.
განსაკუთრებული ყურადღება მიიქცია გენებმა, რომლებიც დნმ-ის აღდგენასა და ანთებითი პროცესების რეგულირებაში მონაწილეობენ. მკვლევრების ვარაუდით, ჯონათანს ასაკის მიუხედავად, გენების მუშაობის კონტროლის შენარჩუნება შეუძლია, რაც შესაძლოა მისი ხანგრძლივი სიცოცხლის ერთ-ერთი მიზეზი იყოს.
კვლევამ ასევე აჩვენა, რომ კუს მიტოქონდრიები - უჯრედების ენერგიის გამომმუშავებელი სტრუქტურები, კარგ მდგომარეობაშია. მეცნიერები ვარაუდობენ, რომ მიტოქონდრიების ეფექტიანი მუშაობა ხანგრძლივ სიცოცხლესთან შეიძლება იყოს დაკავშირებული.
თუმცა, მკვლევრები ხაზგასმით აღნიშნავენ, რომ ერთი კუს გენეტიკური მონაცემები საბოლოო დასკვნების გამოსატანად საკმარისი არ არის. დამატებითი კვლევებია საჭირო იმის გასარკვევად, ეს თავისებურებები მხოლოდ ჯონათანს ახასიათებს თუ გიგანტური კუების სხვა წარმომადგენლებსაც.
მეცნიერების აზრით, ამ მექანიზმების შესწავლამ შესაძლოა, მომავალში ადამიანებში დაბერების პროცესის უკეთ გაგებასა და ასაკთან დაკავშირებული დაავადებების წინააღმდეგ ბრძოლის ახალი მეთოდების შემუშავებას შეუწყოს ხელი. თუმცა, ჯერჯერობით უცნობია, შესაძლებელი იქნება თუ არა, ამ აღმოჩენების საფუძველზე ისეთი მკურნალობის შექმნა, რომელიც ადამიანებში სიცოცხლეს გაახანგრძლივებს.