"იგეგმებოდა პოლონეთის პრემიერ-მინისტრისა და თავდაცვის მინისტრის მკვლელობა" - დააკავეს ეჭვმიტანილი: რას წერს ადგილობრივი მედია
პოლონეთის პრემიერ-მინისტრის, დონალდ ტუსკის განცხადებით, დააკავეს პირი, რომელსაც მასა და თავდაცვის მინისტრზე მკვლელობის მიზნით თავდასხმის დაგეგმვაში ედება ბრალი, - ინფორმაციას BBC-ი ავრცელებს.
- ტუსკმა პოლიციას მადლობა გადაუხადა ეჭვმიტანილის დაკავებისას გამოჩენილი "ოპერატიული და გადამჭრელი ქმედებებისთვის“. სპეციალური სამსახურების კოორდინატორის პრესსპიკერმა იაცეკ დობჟინსკიმ ადგილობრივ მედიას განუცხადა, რომ ეჭვმიტანილი, რომელიც პოლონეთის მოქალაქეა, ქვემო სილეზიის რეგიონში დააკავეს.
მანამდე, პოლონეთის შინაგან საქმეთა სამინისტრომ გაავრცელა ინფორმაცია, რომ პოლიციამ მიიღო სარწმუნო ცნობები დონალდ ტუსკსა და თავდაცვის მინისტრზე, ვლადისლავ კოსინიაკ-კამიშზე შესაძლო თავდასხმების შესახებ.
გუშინ, დაგეგმილი თავდასხმების შესახებ ინფორმაციის მიღების შემდეგ, პოლონეთის უსაფრთხოების სამსახურებმა სპეციალური შეხვედრა გამართეს; უწყების წარმომადგენელმა განაცხადა, რომ ოფიციალური პირები ამ საფრთხეს "უკიდურესად სერიოზულად“ აღიქვამენ.
შინაგან საქმეთა სამინისტროს პრესსპიკერის, კაროლინა გალეცკას განცხადებით, გეგმა მას შემდეგ გამოაშკარავდა, რაც სახელმწიფო დაცვის სამსახურმა, რომელიც მინისტრების უსაფრთხოებაზეა პასუხისმგებელი, პოლიციას ელექტრონული ფოსტით მიღებული შეტყობინება გადაუგზავნა, რომელიც შესაძლო თავდასხმის შესახებ ინფორმაციას მოიცავდა.