წინანდალმა ჯაზისა და ღვინის ფესტივალს JAZZ&WINE Kakheti მეათედ უმასპინძლა
10 ოქტომბერს, წინანდლის ისტორიულ მამულებში ჯაზისა და ღვინის ფესტივალმა „JAZZ&WINE Kakheti“ სტუმრებს მეათედ უმასპინძლა. შემოდგომის კახეთისთვის დამახასიათებელი გარემო, ქართული ღვინის მრავალფეროვნება და ცოცხალი მუსიკა მთელი დღის განმავლობაში ერთიან საფესტივალო განწყობას ქმნიდა.
ფესტივალის სტუმრებს შესაძლებლობა ჰქონდათ, წინანდლის მამულების განსაკუთრებულ გარემოში გაეტარებინათ დღე, დაეგემოვნებინათ სხვადასხვა მწარმოებლის ღვინო და მუსიკალური პროგრამისთვის მოესმინათ. ღონისძიება, რომელიც უკვე ათი წელია ღვინის კულტურასა და ჯაზს აერთიანებს, წელსაც განსხვავებული გამოცდილების მისაღებად შეკრებილ ადამიანებს მასპინძლობდა.
ფესტივალი ქართული ღვინის დეგუსტაციით გაიხსნა. ღონისძიებაში 40-ზე მეტი ღვინის მწარმოებელი მონაწილეობდა, მათ შორის მცირე და ბუტიკური მარნები. სტუმრებს შესაძლებლობა ჰქონდათ, სხვადასხვა სახეობის ღვინო დაეგემოვნებინათ, მწარმოებლებს გასაუბრებოდნენ და ქართული მეღვინეობის მრავალფეროვნება უკეთ გაეცნოთ.
ღვინის დეგუსტაციას თან ახლდა ფესტივალის მუსიკალური პროგრამა, რომელიც დღის განმავლობაში სხვადასხვა ჟანრისა და შესრულების სტილის მუსიკოსებს აერთიანებდა. წინანდლის ისტორიული გარემო, ღია სივრცე და ცოცხალი მუსიკა ღონისძიებას იმ განსაკუთრებულ ხასიათს სძენდა, რომელიც „JAZZ&WINE Kakheti“-ს კონცეფციის მნიშვნელოვანი ნაწილია.
მუსიკალური პროგრამა იტალიური ჯგუფის, SUGARPIE & THE CANDYMEN-ის გამოსვლით გაგრძელდა. მოგვიანებით მსმენელის წინაშე პროექტი FRED WESLEY GENERATIONS წარდგა, ფესტივალის დასკვნითი ნაწილი კი ამფითეატრში გაიმართა. საღამოს მუსიკალური პროგრამა შვეიცარიულ-ამერიკულმა პროექტმა SOUL TRAIN — JJ’s Hausband feat. Reggie Saunders-მა დაასრულა.
ფესტივალის განმავლობაში მუსიკა და ღვინო მხოლოდ ორი პარალელური მიმართულება არ ყოფილა - ისინი საერთო გამოცდილების ნაწილად იქცა. სტუმრებს შეეძლოთ, ერთი მხრივ, ქართული ღვინის კულტურას გაცნობოდნენ, მეორე მხრივ კი, სხვადასხვა მუსიკალური პროექტის შესრულებისთვის მოესმინათ. სწორედ ამ ორი მიმართულების თანაარსებობა ქმნის ფესტივალის კონცეფციას, რომელიც კულტურულ ღონისძიებასთან ერთად კახეთის გაცნობისა და რეგიონის ტურისტული მიმზიდველობის წარმოჩენის შესაძლებლობაცაა.
„JAZZ&WINE Kakheti“-ს დამფუძნებლის, კახა კანდელაკის განცხადებით, ფესტივალის დაარსების ერთ-ერთი მთავარი მიზანი ქართული ღვინის კულტურის პოპულარიზაცია და ადგილობრივი მწარმოებლების მხარდაჭერა იყო.
„საქართველოში ფესტივალი ათი წლის წინ დავაარსეთ. ვფიქრობ, მისი ჩატარება ჩვენი ქვეყნისთვის მნიშვნელოვანი იყო, რადგან საქართველო ღვინის ერთ-ერთი სამშობლოა. ფესტივალს ყოველწლიურად ბევრი უცხოელი ტურისტიც სტუმრობს“, — განაცხადა კახა კანდელაკმა.
მისივე თქმით, ფესტივალი მცირე მარნებს საკუთარი პროდუქციის ფართო აუდიტორიისთვის წარდგენისა და ახალი მომხმარებლების მოზიდვის შესაძლებლობას აძლევს. მსგავსი ღონისძიებები ადგილობრივი მწარმოებლებისთვის მნიშვნელოვანია, რადგან მათ საშუალებას აძლევს, ღვინო უშუალოდ გააცნონ როგორც ქართველ, ისე უცხოელ სტუმრებს.
ათი წლის განმავლობაში „JAZZ&WINE Kakheti“ ქართული ღვინისა და ცოცხალი მუსიკის ერთ სივრცეში გაერთიანების იდეას ემსახურება. წინანდლის მამულებში გამართული ფესტივალი ამ ორი კულტურული მიმართულების წარმოჩენასთან ერთად კახეთის ტურისტულ პოტენციალსაც უსვამს ხაზს - რეგიონს, სადაც ღვინის ტრადიცია, ისტორიული გარემო და კულტურული ღონისძიებები სტუმრებს განსხვავებულ გამოცდილებას სთავაზობს.
R