პაკისტანში სკოლის სახურავი ჩაინგრა - დაიღუპა 28 ადამიანი, მათ შორის 27 მოსწავლე
პაკისტანის ქალაქ ფეშავარში გაკვეთილების მიმდინარეობისას სკოლის სახურავი ჩამოინგრა. დაიღუპა 28 ადამიანი - 27 მოსწავლე და ერთი მასწავლებელი. დაღუპულთა უმეტესობა 13 წლამდე ასაკის ბავშვია.
ინფორმაციას Reuters-ი ავრცელებს.
- ტრაგედია ქალაქის ჩრდილოეთ ნაწილში, დირ-კოლონიის რაიონში მოხდა. მაშველების ინფორმაციით, თავდაპირველად შენობის ზედა სართულის სახურავი ჩამოინგრა და პირველი სართულის კონსტრუქციებს დაეცა. იმ დროს იქ გაკვეთილები მიმდინარეობდა. ამის შემდეგ შენობის სხვა ნაწილებიც ჩამოიშალა.
მაშველებმა ნანგრევებიდან, სულ მცირე, 45 ბავშვი გამოიყვანეს. ადგილზე სამაშველო ოპერაცია გრძელდება.
დაშავებულებისთვის დახმარების დროულად გასაწევად ერთ-ერთ საავადმყოფოში საგანგებო მდგომარეობა გამოცხადდა.
ტრაგედიას პაკისტანის უმაღლესი ხელისუფლების წარმომადგენლები გამოეხმაურნენ. ქვეყნის პრემიერ-მინისტრმა, შეჰბაზ შარიფმა, დაღუპულთა ოჯახებს მიუსამძიმრა და დაშავებულებისთვის საჭირო სამედიცინო დახმარების გაწევა დაავალა.
ხელისუფლებამ მომხდარის მიზეზების დასადგენად გამოძიების დაწყების განკარგულება გასცა.