კუნძულ ბალიზე ტურისტმა ობობას მოსაშორებლად ქაღალდს ცეცხლი მოუკიდა და 112 ათასი დოლარის ღირებულების ვილა გადაწვა
ნეპალელმა ტურისტმა ბალიზე, ობობის დასაფრთხობად, ქაღალდს ცეცხლი წაუკიდა, თუმცა ცეცხლი ვილის სახურავს მოედო და რამდენიმე წუთში შენობა მთლიანად გაანადგურა. შემთხვევის შედეგად არავინ დაშავებულა.
- 45 წლის გაურაპ რანა 5 ოქტომბერს, ბალის ჩრდილოეთ კუტას რაიონში, დასასვენებელ ვილაში იმყოფებოდა, როდესაც სააბაზანოში ობობა შენიშნა. როგორც მედია წერს, მამაკაცმა მისი მოშორება ქაღალდისთვის ცეცხლის წაკიდებით სცადა, თუმცა ცეცხლი შენობას მოედო.
ბადუნგის პოლიციის წარმომადგენლის, იპდა ნი ნიომან იუნი ელტარის განცხადებით, ტურისტმა ქაღალდის დაწვის შემდეგ სააბაზანო დატოვა და სამუშაო ოთახში გავიდა. სავარაუდოდ, ქარმა ცეცხლმოკიდებული ქაღალდი წაიღო, რის შედეგადაც, ვილის სახურავს ცეცხლი გაუჩნდა.
შენობის სახურავი ალანგ-ალანგისგან იყო დამზადებული - ეს მრავალწლოვანი ბალახოვანი მცენარეა, რომლისგან დამზადებული საფარიც ადვილად აალებადია. ცეცხლი სწრაფად გავრცელდა და ვილა მთლიანად გაანადგურა.
დასასვენებელი სახლის ღირებულება დაახლოებით 112 000 დოლარად არის შეფასებული. ხანძრის დროს ძლიერი ქარი და ცხელი, მშრალი ამინდიც ხელს უწყობდა ცეცხლის გავრცელებას.
გაურაპ რანამ შენობიდან გამოსვლა შეძლო. ხანძრის შედეგად არც ის დაშავებულა და არც ახლომდებარე შენობები დაზიანებულა.
შემთხვევის ამსახველ ვიდეოკადრებში ჩანს, როგორ ამოდის შენობიდან კვამლის ღრუბლები, ადგილობრივები კი ხანძრის ჩაქრობას ცდილობენ.
- უცნობია, რომელი სახეობის ობობის მოშორებას ცდილობდა ტურისტი. ბალიზე შხამიანი ობობებიც ბინადრობენ, თუმცა კუნძულის სამედიცინო კლინიკის ინფორმაციით, ტურისტულ საცხოვრებლებში მათ იშვიათად შეხვდებით. ობობების უმეტესობა ადამიანისთვის უვნებლად მიიჩნევა.
ამ დროისთვის უცნობია, დაეკისრება თუ არა ტურისტს მომხდარის გამო რაიმე პასუხისმგებლობა.