ტრაგედია სამხედრო ბაზაზე - კანადაში, სწავლების დროს გაჩენილმა მასშტაბურმა ხანძარმა სულ მცირე 7 ადამიანი იმსხვერპლა, დაშავდა ათობით ჯარისკაცი

კანადის ალბერტას პროვინციაში, უეინრაიტის სამხედრო ბაზაზე მომხდარი მასშტაბური ხანძრის შედეგად რამდენიმე ადამიანი დაიღუპა და ათობით დაშავდა. შემთხვევა საბრძოლო სროლების სწავლებისას გაზსადენზე ან გაზის ჭაბურღილზე დარტყმას უკავშირდება.

• ალბერტას პროვინციაში მდებარე უეინრაიტის ბაზა კანადის შეიარაღებული ძალების ერთ-ერთი ყველაზე აქტიური სასწავლო პოლიგონია, სადაც ჩვეულებრივ დღეს 690 სამხედრო და 300 სამოქალაქო პირი იმყოფება.

ტელეკომპანია Global News-ის ცნობით, რომელსაც სამხედრო წყაროები მოჰყავს, ცეცხლი მას შემდეგ გაჩნდა, რაც ცოცხალი ცეცხლით სწავლებისას ჭურვი გაზსადენს ან გაზის ჭაბურღილს მოხვდა. წინასწარი მონაცემებით, დაღუპულია სულ მცირე 7 ადამიანი, ხოლო ათობით დაშავდა.

კანადის თავდაცვის მინისტრმა დევიდ მაკგინტიმ განაცხადა, რომ ვითარება “ძალიან აქტიური და სათუთია“. მისი თქმით, მას არ ახსოვს მსგავსი მასშტაბის ინციდენტი უახლეს ისტორიაში. ედმონტონის Royal Alexandra-ს საავადმყოფოში გამოცხადდა საგანგებო რეჟიმი - “ნარინჯისფერი კოდი“, რაც მასობრივი მსხვერპლის დროს მოქმედებს.

საავადმყოფოს გადაუდებელი დახმარების ექიმმა უორენ თირსკმა ადგილობრივ მედიასთან განაცხადა, რომ პაციენტების ნაკადი იმდენად დიდია, რომ ქალაქის სამედიცინო დაწესებულებებს გაძლება უჭირთ.

უეინრაიტის მუნიციპალიტეტის ცნობით, შაბათს გაჩენილი ცეცხლი ძლიერი ქარის გამო სწრაფად გავრცელდა და ბაზის ღობეებს გასცდა. ადგილობრივმა ხელისუფლებამ მოსახლეობას მოუწოდა, მოერიდონ აღნიშნულ ტერიტორიას და გზა დაუთმონ სპეცტექნიკას.

კანადის პრემიერ-მინისტრმა მარკ კარნიმ განაცხადა, რომ მოვლენები “სერიოზული ინციდენტია, რამაც მასშტაბური ხანძარი გამოიწვია“ და თანაგრძნობა გამოუხატა დაზარალებულ სამხედროებსა და მათ ოჯახებს.