"რა გულუბრყვილო ვიყავი, როცა მჯეროდა, რომ ენას შეეძლო მწუხარების გადმოცემა" - სინდი კროუფორდისა და კაია გერბერის ემოციური სიტყვები შვილისა და ძმის გარდაცვალების გამო

სუპერმოდელ სინდი კროუფორდის ოჯახი მძიმე დანაკარგს გლოვობს. 20 სექტემბერს 27 წლის პრესლი გერბერი გარდაიცვალა - სუპერმოდელისა და ბიზნესმენის, რენდი გერბერის ერთადერთი ვაჟი. ახალგაზრდა მამაკაცი სარეაბილიტაციო ცენტრში დაიღუპა, სადაც ნარკოდამოკიდებულებისგან განკურნებას ცდილობდა.

• 18 ოქტომბერს სინდი კროუფორდმა ოჯახის სახელით საზოგადოებას პირველად მიმართა და შვილის გარდაცვალების შემდეგ განცდილი ტკივილის შესახებ ისაუბრა. გავრცელებულ განცხადებას ხელს აწერენ სინდი კროუფფორდი და მისი მეუღლე, ასევე შვილი, კაია გერბერი:

"პრესლი უოკერ გერბერი. 1999 წლის 2 ივლისი - 2026 წლის 20 სექტემბერი. ჩვენი საყვარელი შვილისა და ძმის დაკარგვით გამოწვეულ აუტანელ ტკივილს განვიცდით. თავს წარმოუდგენლად ბედნიერად მივიჩნევთ, რომ პრესლი 27 წლის განმავლობაში ჩვენი ცხოვრების ნაწილი იყო. ის კეთილი და მშვენიერი ადამიანი იყო, რომელსაც უყვარდა და რომელიც თავადაც უყვარდათ. ასე იქნება ყოველთვის.

ვამაყობთ იმ ადამიანით, როგორიც ის იყო, და იმით, თუ როგორ ცხოვრობდა ამ სამყაროში - სიკეთითა და გულღია გულით, საკუთარი სისუსტეების გამოჩენის შიშის გარეშე. მადლიერი ვართ იმ სიყვარულისა და მხარდაჭერის უზარმაზარი ტალღისთვის, რომელსაც ჩვენი ოჯახის კარგად ნაცნობი ადამიანებისა და უცნობებისგან ვგრძნობთ. ისინი ჩვენს ტკივილს იზიარებენ.

შეხვედრამდე, ჩვენო საყვარელო ბიჭო. სამუდამოდ გვეყვარები. დედა, მამა და კაია“, - ნათქვამია ოჯახის მიმართვაში.

• პრესლის გარდაცვალებას სოციალურ ქსელში მისი და, კაია გერბერიც გამოეხმაურა. მან ძმას ემოციური სიტყვები მიუძღვნა და აღნიშნა, რომ დანაკარგის გადმოსაცემად სიტყვები საკმარისი არ არის.

"ჩემო ძვირფასო ძმაო, სიტყვები არ მაქვს. შესაძლოა, მცირედი ნუგეში ის იყოს, რომ მთელი ამ დროის განმავლობაში სიტყვები არც გვჭირდებოდა. ისინი გვღალატობენ, ამახინჯებენ და ამარტივებენ სათქმელს, ცდილობენ, ყველაფერი შეაჯამონ, მაგრამ სიმართლემდე მაინც ვერ მიდიან. რა გულუბრყვილო ვიყავი, როცა მჯეროდა, რომ ენას შეეძლო მწუხარების გადმოცემა", - წერს კაია გერბერი.