ახალგაზრდა კაცი, რომელიც გლდანი მოლში მოულოდნელად გარდაიცვალა, ცნობილი სპორტსმენია - ის საქართველოს ხელბურთის ეროვნულ ნაკრებში თამაშობდა: დეტალები
გუშინ "გლდანი მოლში" გარდაცვლილი ახალგაზრდა მამაკაცი საქართველოს ხელბურთის ეროვნული ნაკრების ყოფილი წევრი, ვეტერანი ხელბურთელი და მწვრთნელი, რატი მსხვილიძეა.
ამის შესახებ ინფორმაციას სოციალურ ქსელში მისი ახლობლები ავრცელებენ.
- როგორც თვითმხილველები გუშინ ჰყვებოდნენ, ახალგაზრდა მამაკაცმა თავი შეუძლოდ იგრძნო და წნევის გასაზომად "ავერსის" აფთიაქში შევიდა, სადაც ის, სავარაუდოდ, გულის შეტევით გარდაიცვალა.
მოგვიანებით გაირკვა, რომ გარდაცვლილი ვეტერანი ხელბურთელი და მწვრთნელი რატი მსხვილიძეა.
"საქართველოს ხელბურთის ეროვნული ფედერაცია ღრმა მწუხარებით იუწყება საქართველოს ეროვნული ნაკრების ყოფილი წევრის, ვეტერანი ხელბურთელისა და მწვრთნელის, რატი მსხვილიძის გარდაცვალებას.
რატი მსხვილიძეს მნიშვნელოვანი წვლილი მიუძღვის ქართული ხელბურთის განვითარებაში.
სპორტული კარიერის განმავლობაში იგი როგორც საქართველოს, ისე ევროპის სხვადასხვა კლუბში თამაშობდა, მოგვიანებით კი სამწვრთნელო საქმიანობას ეწეოდა და საკუთარ გამოცდილებასა და ცოდნას ახალგაზრდა თაობას უზიარებდა.მისი გარდაცვალება დიდი დანაკლისია ქართული ხელბურთისა და სპორტული საზოგადოებისთვის.საქართველოს ხელბურთის ეროვნული ფედერაცია უსამძიმრებს რატი მსხვილიძის ოჯახის წევრებს, ახლობლებსა და მეგობრებს", - აღნიშნულია ხელბურთის ფედერაციის მიერ გამოქვეყნებულ ინფორმაციაში.
- ვეტერან ხელბურთელ ემშვიდობებიან ქართული სპორტის ქომაგები."ქომაგები გამოვხატავთ დიდ გულისტკივილს თანავუგრძნობთ ხელბურთის სამყაროს, გულშემატკივარს და ოჯახს უდიდეს დანაკლისს.
ჩვენ გვახსოვს რატის თავდადებული თამაში ეროვნული დროშის ქვეშ, გვახსოვს მისი ძალისხმევა ტრავმის მიუხედავად და გვახსოვს მიდი უდიდესი როლი ჩვენი ნაკრების წარმატებაში", - ნათქვამია ქომაგების სამძიმრის წერილში.