“თუ ზელენსკის ომის დასრულება არ სურს, ძალიან ცუდია“ - ტრამპი ისევ უკრაინის პრეზიდენტზე ლაპარაკობს: რა ხდება ცნობილი უიტკოფის ახალ მისიაზე ოსლოდან სანქტ-პეტერბურგში?

აშშ-ის პრეზიდენტის, დონალდ ტრამპის განცხადებით, რუსეთი ბრძოლის ველზე ტემპის შენელების არანაირ ნიშანს არ ავლენს. “ისინი უბრალოდ განაგრძობენ წინსვლას“, - აღნიშნა ტრამპმა.

ამასთანავე, აშშ-ის პრეზიდენტის მტკიცებით, “რუსეთს შეთანხმების მიღწევა სურს”. ტრამპის განცხადებით, უკრაინის პრეზიდენტს, ვოლოდიმირ ზელენსკის ომის დასრულება უნდა სურდეს.

• “უკრაინას უნდა სურდეს ამ ომის დასრულება. ზელენსკის უნდა სურდეს ამ ომის დასრულება და თუ მას ეს არ სურს, ვფიქრობ, ძალიან ცუდი იქნება“, - აღნიშნა ტრამპმა.

მისი თქმით, შეერთებულმა შტატებმა უკრაინას ასობით მილიარდი დოლარი გადასცა, სანაცვლოდ კი არაფერი მიუღია გაძვირებული საწვავის გარდა.

“სანაცვლოდ არაფერი მიგვიღია, გარდა დიზელის საწვავის მაღალი ფასებისა. ჩვენ, ალბათ, შესაძლოა, თითქმის ნებისმიერ სხვა ქვეყანაზე მეტი ფული მივეცით უკრაინას წლების განმავლობაში - ასობით მილიარდი დოლარი”, - აღნიშნა აშშ-ის პრეზიდენტმა.

ამასთან, აშშ-ის ომის მინისტრის, პიტ ჰეგსეთის განცხადებით, აშშ-ს უკრაინაში Starshield-ის სისტემის მუშაობის შეზღუდვაში მონაწილეობა არ მიუღია და შესაბამისი ბრძანებები არ გაუცია.

“ჩვენ არაფერი შეგვიზღუდავს. არსებობს მომსახურების პირობები, რომელთა დაცვაც აუცილებელია და საბოლოო ჯამში, ამ გადაწყვეტილებების მიღების შესაძლებლობა Starlink-ს აქვს. თუმცა, ჩვენი პოზიცია არ შეცვლილა. ჩვენ არანაირი მითითება არ გაგვიცია და რა თქმა უნდა, უკრაინელებს წარმატებას ვუსურვებთ”, - აღნიშნა ჰეგსეთმა.

ტრამპის განცხადებების პარალელურად, აშშ აქტიურ შეხვედრებს მართავს უკრაინის ხელმძღვანელობასთან. აშშ-ის პრეზიდენტის სპეციალური წარმომადგენელი, სტივ უიტკოფი გუშინ ნორვეგიაში უკრაინის პრეზიდენტს შეხვდა, შემდეგ კი სანქტ-პეტერბურგში გაემგზავრა.

ამის შესახებ ნორვეგიის პრემიერ-მინისტრმა, იონას გარ სტორემ პრესკონფერენციაზე განაცხადა.

სტორემ აღნიშნა, რომ აშშ-ის პრეზიდენტის სპეცწარმომადგენელი, სტივ უიტკოფი, რომელიც 20 ოქტომბერს ოსლოში უკრაინის პრეზიდენტ, ვოლოდიმირ ზელენსკის შეხვდა, 21 ოქტომბერს სანქტ-პეტერბურგში გაემგზავრება.

“ის რუსეთის ხელმძღვანელობას შეხვდება და აზრებს გაცვლის ამ შეხვედრასთან და წინადადებებთან დაკავშირებით, რომლებზეც ევროპელი და ამერიკელი კოლეგები მუშაობდნენ, და, შესაძლოა, ნიადაგს მოამზადებს ლიდერების დონეზე შეხვედრისთვის”, - განაცხადა სტორემ.

ნორვეგიის პრემიერ-მინისტრის თქმით, შეხვედრაზე განხილულ იქნა საკითხები, რომლებიც “უკავშირებდა უკრაინის უსაფრთხოებას, ომის შემდეგ აყვავების გეგმას, ტერიტორიულ საკითხებს, სანქციების საკითხებს, და ასევე ევროპული უსაფრთხოების საკითხებს ომის დასრულების შემდეგ”.