საკონსტიტუციო სასამართლოში პოლიტიკური პარტიების აკრძალვის შესახებ სარჩელის განხილვა დაიწყო - ვინ რა განაცხადა სკანდალური პროცესის წინ?

საკონსტიტუციო სასამართლოში პოლიტიკური პარტიების აკრძალვაზე სახელისუფლო გუნდის სარჩელის განხილვა დაიწყო. საქმეს საკონსტიტუციო სასამართლოს შვიდი მოსამართლის შემადგენლობით პლენუმი იხილავს.

დაწყებამდე საკონსტიტუციო სასამართლოს შენობაში მხარეებს შორის მცირე სიტყვიერი შელაპარაკება იყო, როდესაც სხდომათა დარბაზში შესვლასა და დასწრებას, როგორც ოპოზიციური პარტიების წარმომადგენლები და მათი მხარდამჭერები, ისე სარჩელის ავტორების მომხრეები ცდილობდნენ.

საკონსტიტუციო სასამართლოში წარდგენილ სარჩელს პარლამენტის 88 დეპუტატი წევრი აწერს ხელს. მათი სარჩელის საფუძველზე სასამართლოს დღის წესრიგში შემდეგი ხუთი პოლიტიკური გაერთიანებების არაკონსტიტუციურად ცნობის საკითხი დგას: - "ერთიანობა - ნაციონალური მოძრაობა“; "კოალიცია ცვლილებისთვის - გვარამია მელია გირჩი დროა“; "ძლიერი საქართველო - ლელო, ხალხისთვის, თავისუფლებისთვის!“, "ფედერალისტური პარტია“ და პარტია "გახარია საქართველოსთვის“.

სარჩელის ავტორთა განცხადებით, ზემოაღნიშნული პოლიტიკური გაერთიანებები 2016 წლიდან უწყვეტ რეჟიმში უარყოფენ საქართველოს მოქმედი ხელისუფლების და მმართველი პოლიტიკური პარტიის როგორც საშინაო პოლიტიკურ, ისე საგარეო პოლიტიკურ ლეგიტიმაციას და ამით აღიარებენ, რომ მათსა და მმართველ პარტიას შორის ერთ-ერთი მხარე უსათუოდ არაკონსტიტუციურად უნდა შეირაცხოს. სარჩელში ასევე ნათქვამია, რომ ზემოხსენებული პოლიტიკური პარტიების საქმიანობის მიზანია საქართველოს კონსტიტუციური წყობილების დამხობა და ძალადობით შეცვლა, საქართველოს დამოუკიდებლობის ხელყოფა და ტერიტორიული მთლიანობის დარღვევა, რის გამოც ეს პარტიები არაკონსტიტუციურად უნდა იყოს ცნობილი და პოლიტიკური საქმიანობა აეკრძალოს.

პარტიების აკრძალვის ერთ-ერთ არგუმენტად დასახელებულია ის, რომ ეს ხუთი პარტია საყოველთაო არჩევნების გზით არჩეულ ორგანოებში, საქართველოში მიმდინარე პოლიტიკურ პროცესებსა და ამ კონსტიტუციურ სარჩელში წარმოდგენილ არაკონსტიტუციურ ქმედებებში, მათ შორის საქართველოს სახელმწიფოს წინააღმდეგ წარმოებულ საბოტაჟში წლების განმავლობაში თვისებრივად ერთნაირი პოზიციით წარმოჩინდებოდნენ, საერთო მისწრაფებით მოქმედ კოალიციურ ერთობას ქმნიდნენ და დღესაც ასე მოქმედებენ.

• როგორც მმართველი გუნდის, ისე ოპოზიციური პარტიების წარმომადგენლებმა სასამართლო განხილვის დაწყებამდე დაკავშირებით კომენტარები გააკეთეს.

უკვე 14 წელია ქართული საზოგადოება გვავალებს, გვთხოვს და მოელის, სამართლებრივად შეფასდეს "ნაციონალური მოძრაობის“ სისხლიანი რეჟიმი - 14 წლის მოლოდინი და დავალება დღეს შესრულდება ისტორიულ პროცესზე, სადაც საკონსტიტუციო სასამართლოს აქვს ვალდებულებაც და ამავდროულად, გამოწვევაც, რომ სამართლებრივად შეაფასოს დამოუკიდებელი საქართველოს ისტორიის 22 წელი, - ამის შესახებ პარლამენტის იურიდიულ საკითხთა კომიტეტის თავმჯდომარემ არჩილ გორდულაძემ განაცხადა, რომელიც ერთ-ერთია იმ დეპუტატთაგან, ვინც დღეს საკონსტიტუციო სასამართლოში "ქართული ოცნების“ პოზიციებს წარადგენს.

როგორც გორდულაძემ აღნიშნა, მმართველი გუნდი ყველა სამართლებრივ მტკიცებულებას წარადგენს და საზოგადოებას მიეცემა შესაძლებლობა, "კიდევ ერთხელ გაიხსენოს "კოლექტიური ნაციონალური მოძრაობის“ მიერ ჩადენილი მავნებლობები და ანტიდემოკრატიული ქმედებები“.

"ნაციონალური მოძრაობას“, მის ე.წ. განშტოებებს, 2004-2012 წლებში პირდაპირ დამხობილი ჰქონდათ საქართველოს სახელმწიფოებრივი წყობილება, დემოკრატიული საფუძველი და 2012 წლის შემდეგ, უკვე დღევანდელ დღემდე, ისინი კლავ ცდილობენ, რომ დემოკრატიას გამოუთხარონ საფუძველი, ფეხქვეშ გათელონ ადამიანის უფლებები, გარე მითითებების დამორჩილებით ხელი შეუწყონ ჩვენი ქვეყნის დამოუკიდებლობის ხელყოფას.

შესაბამისად, 14 წლის მოლოდინი და დავალება ჩვენ მიმართ დღეს შესრულდება ისტორიულ პროცესზე - პროცესზე, როდესაც საკონსტიტუციო სასამართლოს აქვს ვალდებულებაც და ამავდროულად, გამოწვევაც, რომ სამართლებრივად შეაფასოს დამოუკიდებელი საქართველოს ისტორიის 22 წელი და ის მოვლენები, რომელთა მიზანიც არის გარე მმართველობის ჩვენს ქვეყანაში დამყარება.

საბოლოო ჯამში, ჩვენ სამართლებრივად ყველა მტკიცებულებას წარვადგენთ კიდევ ერთხელ და საზოგადოებას შეიძლება პირდაპირი ეთერის მიმდინარეობისას, თვალყური ადევნოს და კიდევ ერთხელ გაიხსენოს ის მავნებლობები და ის ანტიდემოკრატიული ქმედებები, რაც აქვს "ნაცმოძრაობას", მასთან მჭიდროდ დაკავშირებულ ოთხ პარტიას, რომლებიც ან უშუალოდ არიან პროცესის მონაწილეები, ან მხარს უჭერენ ამ ანტიკონსტიტუციურ ქმედებებს და საბოლოო ჯამში, ჩვენ გვაქვს მოლოდინი, რომ საკონსტიტუციო სასამართლო მიიღებს ერთადერთ სამართლებრივ და ლოგიკურ გადაწყვეტილებას, რომ შეფასდება სამართლებრივად მათი მავნებლობები და აიკრძალებიან ის კონსტიტუციური პარტიები, რომელთა მიზანი საქართველოს მომავლის უზრუნველყოფა ნამდვილად არ არის. ხოლო, მეორე მხრივ, ჩვენი მოლოდინიდან გამომდინარე, საკონსტიტუციო სასამართლოს შედეგი იქნება დემოკრატიისთვის გზის გახსნა და ის ოკუპაცია, რომელიც არის კოლექტიური "ნაცმოძრაობის" სახით ოპოზიციურ ველზე, დასრულდება და შეეძლებათ ადამიანებს, რომელთა მიზანიც არის ჩვენი ქვეყნის სასიკეთოდ პოლიტიკური აქტივობა, კიდევ უფრო მეტი შესაძლებლობა, რომ პოლიტიკურ საქმიანობაში ჩაერთონ," - განაცხადა არჩილ გორდულაძემ.

• "ერთიანი ნაციონალური მოძრაობის“ წევრის, ანა წითლიძის შეფასებით, სარჩელი მიმართულია არა "ერთიანი ნაციონალური მოძრაობისა“ და პოლიტიკური პარტიების წინააღმდეგ, არამედ საქართველოს სუვერენიტეტისა და თავისუფლების წინააღმდეგ.

"ამ სარჩელს არანაირი კავშირი არ აქვს სამართლებრივ პროცესთან. არ არის დღეს ეს პროცესი სამართლებრივი და წარმოდგენილი სარჩელიც არ არის სამართლებრივი. ეს არის პოლიტიკური სარჩელი და ეს არის რეალურად ის სარჩელი, რაც დაიწერა არა "ქართული ოცნების“ ოფისში, არამედ კრემლში. სარჩელი მიმართულია არა "ერთიანი ნაციონალური მოძრაობისა“ და პოლიტიკური პარტიების წინააღმდეგ, არამედ საქართველოს სუვერენიტეტისა და თავისუფლების წინააღმდეგ.

საკონსტიტუციო სასამართლოს წარმოებაშიც არ უნდა მიეღო ეს სარჩელი, იმიტომ, რომ თავად სარჩელი არის არაკონსტიტუციური. თუ ვინმეს უნდა, რომ ეს პროცესი ვითარდებოდეს საკონსტიტუციო სასამართლოში და ამ სარჩელით დადგინდეს, რომ 2008 წლის ომი დაიწყო საქართველომ და არა რუსეთმა, ეს არის რუსეთი. სწორედ ეს უნდა დააკანონოს საკონსტიტუციო სასამართლომ. მნიშვნელოვანია ვინ არიან ის ადამიანები, ვინც ასამართლებენ ერთიან ნაციონალურ მოძრაობასა“ და "9 წელს“.ეს მათ შორის საქართველოს ისტორიის გადაწერის მცდელობაა. დღეს მოვიტანეთ მათ შორის მასალა იმასთან დაკავშირებით, რეალურად ვინ არის გასასამართლებელი ამ ქვეყანაში იმ სისტემურ დანაშაულებზე, რომელიც 2012 წლიდან დღემდე ხდება "ქართული ოცნების“ მეშვეობით, ყველა სფეროში. მოვითხოვთ, რომ როგორც ფაქტობრივი გარემოება საკონსტიტუციო სასამართლომ საქმეს დაურთოს, თან განიხილოს. არ გვაქვს მოლოდინი საკონსტიტუციო სასამართლოდან, რომ რაიმე განსხვავებულ გადაწყვეტილებას მიიღებენ, იმიტომ, რომ მოსამართლეები არიან "კლანის“ წევრები.

ისინი მიიღებენ იმ გადაწყვეტილებას, რაც დაწერილია კრემლში. ჩვენი სტრატეგია იქნება ბრძოლის გაგრძელება. არ არსებობს ძალა, რომელიც "ერთიან ნაციონალურ მოძრაობას“ შეაჩერებს ამ პროცესში. არ არსებობს წინააღმდეგობა, რაც ჩვენ გაგვაჩერებს. აგვკრძალავენ? - მაინც გავაგრძელებთ ბრძოლას“,- განაცხადა წითლიძემ.

• "ლელო- ძლიერი საქართველოს“ საგარეო მდივნის, გრიგოლ გეგელიას განცხადებით, "ქართული ოცნება“ არის რეჟიმი, რომელიც გავიდა კონსტიტუციური სფეროდან და მიიტაცა მილიონობით ქართველის ხმა.

"ეს არის რეჟიმი, რომელმაც შეცვალა ჩვენი კონსტიტუციურად დადგენილი საგარეო პოლიტიკური კურსი და დღეს ამ შენობაში რამე თუ უნდა განიხილებოდეს, ობიექტურობისთვის, ეს არის ის, თუ როგორ მოხდა სახელმწიფოს და კონსტიტუციური წეს-წყობილების მიტაცება "ქართული ოცნების“ რეჟიმის მხრიდან და როგორ მოხდა საგარეო პოლიტიკური არჩევანის შეცვლა, რაც არის გაწერილი საქართველოს კონსტიტუციაში. ეს არის სრულიად აბსურდული სარჩელი, წავიკითხე და უბრალოდ, შოკში ჩამაგდო, იმდენად აბსურდულია მისი უშინაარსობა. თავიდან ბოლომდე აბსურდულია. მაგალითად "ლელოს“ ნაწილში რასაც წაიკითხავთ, გაეცინება ნორმალურ ადამიანს, რაც არ უნდა "ქოცი“ იყოს მოწოდებით, "ქოცსაც“ გაეცინება, რომ შეიძლება პარტიას კრძალავდნენ პოლიტიკური პოზიციის გამო. ეს არის იგივე, რომ პარტია აკრძალო იმის გამო, რომ თქვას, რომ როგორი მზიანი ამინდიაო და ვიღაც თვლიდეს, რომ მზიანი ამინდი არ არის, არამედ წვიმიანი ამინდია. ამ ტიპის რაღაცების გამო უნდათ ჩვენი აკრძალვა, თან ვის?!

ადამიანებს, რომლებიც თავის დროზე იყვნენ იმ რეჟიმის წარმომადგენლები, რომლის წევრობასაც და რომელთან აფილირებასაც გვაბრალებენ. მათ არგუმენტში რაც დევს, არის სრული სიყალბე. ვასილ როინიშვილმა სხვაზე უნდა ილაპარაკოს, თავის ყოფილ პარტიას რომ კრძალავს ?! ყველა ქართველს მინდა ესმოდეს, რომ ეს აკრძალვა არ ეხება 5 პოლიტიკურ სუბიექტს, ან საერთოდ პარტიებს, ეს აკრძალვა ეხება მილიონზე მეტ ქართველს, იმიტომ, რომ მილიონზე მეტმა ქართველმა რომ არჩევანი გააკეთა დღეს, ამ არჩევანს, თქვენს არჩევანს უნდათ, რომ უწოდონ ანტიკონსტიტუციური.

რეჟიმი, ერის ნახევარს აცხადებს ანტიკონსტიტუციურად და ამბობს, რომ სახელმწიფოს არ უნდა ჰქონდეს კონსტიტუციური თავდაცვის პრეროგატივა, ამბობს, რომ რუსების არგაღიზიანების პოლიტიკა, თურმე კონსტიტუციურად უნდა იყოს დაკანონებული, ანუ ქართულმა სახელმწიფომ უარი უნდა განაცხადოს ნებისმიერი ეროვნული სუვერენული კურსის გატარებაზე. ეს არის "ქოცური“ პოლიტიკის ერთადერთი გამოხატულება“.- განაცხადა გეგელიამ.

• "რასაც ვუყურებ, ერთადერთი პარტია, რომელიც ლეგიტიმურად აიკრძალება ამ ქვეყანაში, არის "ქართული ოცნება“ და ეს მოხდება შემდეგი ხელისუფლების დროს" - ეს განცხადება კოალიცია ცვლილებისთვის“ ერთ-ერთმა ლიდერმა, ნიკა გვარამიამ გააკეთა.

მისივე თქმით, პარტიების აკრძალვასთან დაკავშირებული სარჩელი არის "ისტორიული დოკუმენტი, როგორ უნდა უღალატო სამშობლოს“.

"ასეთი სარჩელია "ქართული ოცნების“ მიერ საკუთარ თავზე დაწერილი განაჩენი. ზოგადად, არ ვარ მომხრე პარტიების გაუქმების და ამ კონტროლის ფორმის, მაგრამ დარწმუნებული ვარ, თუ რამე მართლა შეიძლება ჩაითვალოს საქართველოს კონსტიტუციით პარტიის გაუქმების და ცალკეულ პირებზე პასუხისმგებლობის დაყენების წინაპირობად, ეს არის ის სავარაუდო შედეგები, რომელიც ამ სარჩელის დაკმაყოფილებას მოჰყვება, მათ შორის, მოსამართლეების წინააღმდეგაც. არავინ თქვას, რომ მისთვის არ არის ცნობილი, რას აკეთებს. უკანონობის ჩადენა, ამ შემთხვევაში, უბრალოდ, უკანონობა არ არის. ამას მხოლოდ გვარამიას, მელიას, ხოშტარიას, სააკაშვილის, ჯაფარიძის, ან ვინმეს ციხეში გაშვება კი არ მოჰყვება, ჩვენ გამოვალთ იმ ციხიდან, მაგრამ იმ ჩიხიდან, რომელშიც ამ სარჩელის დაკმაყოფილება საქართველოს შეიყვანს, შეიძლება ქვეყანა ვეღარ გამოვიდეს“, - განაცხადა გვარამიამ.

• ძალიან მოხარული ვიქნები თუ ისინი სამართლებრივად გაგვიწევენ ოპონირებას, მაგრამ ეჭვი მეპარება, - ამის შესახებ თავდაცვის კომიტეტის თავმჯდომარის მოადგილემ თენგიზ შარმანაშვილმა საკონსტიტუციო სასამართლოში სხდომის დაწყებამდე განაცხადა, რითაც უპასუხა კითხვას, შეძლებს თუ არა ოპოზიცია დღეს თავდაცვას.

მან ასევე, ისაუბრა იმაზე, თუ როგორია სასამართლო პროცესების მოლოდინი და რა უნდა შეცვალოს პოლიტიკურ ველზე ამ პროცესმა, თუ მმართველი გუნდის მოთხოვნა დაკმაყოფილდება.

"ისინი [ოპოზიცია] ალბათ შეეცდებიან სანახაობრივი შოუ მოაწყონ იმიტომ, რომ სამართლებრივი არგუმენტები მათ თითქმის არ აქვთ და არც შეიძლება ჰქონდეთ, იმდენად მყარი მტკიცებულებები გაგვაჩნია ჩვენ. ჩვენ მზად ვართ იმისთვის, რომ სამართლებრივად განვიხილოთ ეს საკითხი და ამისთვის ვემზადებით. რა თქმა უნდა, გათვალისწინებული გვაქვს, რომ ჩვენი ოპონენტები შეიძლება ასე არ მოიქცნენ, მაგრამ აქ ჩვენ უძლურები ვართ. ასეთ შემთხვევაში, გადაწყვეტილებას იღებს სასამართლო და ალბათ მიუთითებს, რომ დაბრუნდნენ სამართლებრივ სივრცეში. ჩვენ, იმთავითვე აღვნიშნეთ, რომ მიზანშეწონილობა ამ ეტაპზე არაფერ შუაშია. შუაშია ის, არის თუ არა ესა თუ ის ორგანიზაცია არაკონსტიტუციური და კონსტიტუციის საწინააღმდეგო ქმედებებს ჩადიოდა და ჩადის თუ არა ამჟამად. ამიტომ, ახლა ჩვენ დავიწყოთ იმაზე ფიქრი, რომ მართალია არაკონსტიტუციურია, მართალია კონსტიტუციას არღვევენ, მაგრამ მოდი მიზანშეწონილი არ არის და ხომ არ აგვეღო ამ საკითხზე ხელი, თვითონ მიდგომა არ არის სწორი იმიტომ, რომ არაკონსტიტუციური ორგანიზაცია საქართველოში არ უნდა ფუნქციონირებდეს. ეს პოლიტიკურად მიზანშეწონილია თუ არა“,- განაცხადა შარმანაშვილმა.

• როგორც მან განმარტა, სანამ სახელმწიფო არ იქნებოდა მყარი საკუთარი გადაწყვეტილებების აღსრულების კუთხით, მანამდე, ოპოზიციური პარტიების აკრძალვის პროცესის დაწყება არ იქნებოდა სწორი, შესაბამისად, ამიტომ დადგა დღეს დღის წესრიგში საკონსტიტუციო სასამართლოში სარჩელის შეტანა.

"ამ წლების განმავლობაში ისეთი დიდი ზეწოლა იყო და ისეთი დიდი რისკის ქვეშ იდგა საქართველო, რომ იმთავითვე რომ დაგვეწყო ამ საკითხის განხორციელება, შეიძლება თვითონ სახელმწიფოს არსებობის საკითხიც კი დამდგარიყო, იმდენად მძაფრად იდგა ეს საკითხი. ამაზე პრემიერმა მრავალჯერ ისაუბრა და გავიმეორებ მეც, იმიტომ, რომ ვეთანხმებით ყველა ჩვენი გუნდიდან. ვიდრე სახელმწიფო ფეხზე არ დადგებოდა, ვიდრე არ იქნებოდა მყარი, რომ თავისი გადაწყვეტილებების აღსრულების შესაძლებლობა მიეცემოდა, მანამდე ეს პოლიტიკური რისკი გაწეული არ იქნებოდა და სწორიც იყო, იმიტომ, რომ არ შეიძლება ბრძოლა ისე დაიწყო, სადაც ძალიან დიდი რისკია, რომ შენ კი არ დამარცხდები, თვითონ შენი სახელმწიფო დამარცხდება და ამიტომ ეს რისკი არ იქნა გაწეული.

ახლა, როდესაც ჩვენი სუვერენიტეტის დაცვის ხარისხი გაცილებით უფრო მაღალია, ვიდრე იმ წლებში იყო, რა თქმა უნდა, დადგა ამის დრო და ჩვენ იმ დაკვეთას 1 200 000 კაცისა, რომელსაც არჩევნებამდე ვუთხარით, რომ თუ თქვენ ჩვენ ხმას მოგვცემთ, ჩვენ ამას განვახორციელებთ და საკონსტიტუციო სასამართლოში ამ პროცედურას დავიწყებთ, ჩვენ ეს პროცედურა დავიწყეთ და შევუსრულოთ ის დაპირება 1 200 000 კაცს“, - განაცხადა შარმანაშვილმა.

ბათუმში, საკონსტიტუციო სასამართლოსთან, პარტიების აკრძალვის შესახებ სარჩელის განხილვის პარალელურად აქცია მიმდინარეობს.

• განახლება - 13:07

"ერთიანი ნაციონალური მოძრაობა“ საკონსტიტუციო სასამართლოს პლენუმის სრული შემადგენლობის აცილებას ითხოვს.

ამის შესახებ განცხადება პარტიის წარმომადგენელმა, ანა წითლიძემ საკონსტიტუციო სასამართლოს სხდომაზე გააკეთა.

• განახლება - 13:15

"ლელო - ძლიერმა საქართველომ“ საკონსტიტუციო სასამართლოს სამი მოსამართლის აცილების შესახებ შუამდგომლობა დააყენა. აღნიშნულ პროცესზე „ლელოს“ წარმომადგენლის კახი სამხარაძის განმარტებით, ერთ-ერთი მოსამართლე, ვასილ როინიშვილი, რომლის აცილებასაც ითხოვენ, როგორც ზემდგომი პროკურორი მონაწილეობდა სერჟანტ როინ შავაძის საქმეში.

• განახლება - 13:21

საკონსტიტუციო სასამართლოს პლენუმი, მოსამართლეთა აცილების შუამდგომლობასთან დაკავშირებით, სათათბიროდ გავიდა.

• განახლება - 13:48

საკონსტიტუციო სასამართლომ მოსამართლეების აცილების შუამდგომლობა არ დააკმაყოფილა.

• განახლება - 14:58

"ნაციონალური მოძრაობამ“ საკონსტიტუციო სასამართლოს სხდომაზე ბიძინა ივანიშვილის გამოკითხვის შუამდგომლობა დააყენა

• განახლება - 15:04

ხატია დეკანოიძე საკონსტიტუციო სასამართლოს სხდომათა დარბაზიდან გააძევეს