"სკოლისაკენ უნდა მიიჩქაროდეს, აი იას უნდა კითხულობდეს მაგრამ არა, სიცოცხლისთვის იბრძვის" - 6 წლის მახარეს, რომელიც მძიმე სენს ებრძვის, საზოგადოების მხარდაჭერა სჭირდება
6 წლის მახარე ყვავაძეს, რომელიც მძიმე სენს ებრძვის, საზოგადოების თანადგომა სჭირდება. მახარეს მწვავე ლიმფობლასტური ლეიკემიის დიაგნოზი მიმდინარე წლის ზაფხულში დაუსვეს.
თავდაპირველად, საქართველოში მკურნალობდა, თუმცა ორთვიანი მკურნალობის შემდეგ, მდგომარეობა დამძიმდა.
- მიუხედავად იმისა, რომ უმძიმეს მდგომარეობაში მყოფი ბავშვის ტრანსპორტირება დიდ რისკთან იყო დაკავშირებული, ოჯახმა ის თურქეთში წაიყვანა. მკურნალობა კი ისეთ თანხებთან არის დაკავშირებული, რომ საზოგადოების თანადგომის გარეშე, არაფერი გამოვა.
"ჩემს შვილს, 5 წლის მახარეს მწვავე ლიმფობლასტური ლეიკემია დაუდგინდა. საქართველოში 2-თვიანი მკურნალობის შემდეგ მისი მდგომარეობა დამძიმდა და მიუხედავად იმ რისკებისა, რაც ტრანსპორტირებასთან იყო დაკავშირებული, თურქეთში, სტამბოლის ერთ-ერთ კლინიკაში წავიყვანე. მახარემ გაუძლო გზას და უძლებს ახლაც უდიდეს განსაცდელს. ის კლინიკაში რეანიმაციულ განყოფილებაშია. ჩემს პატარას დახურული აქვს ერთი ფილტვი, ექიმები ცდილობენ აუმუშაონ, თუმცა ჯერჯერობით მდგომარეობა სტაბილურად მძიმეა.
რეანიმაციაში თითოეული დღის ღირებულება ჩემთვის კი არა, ძალიან მდიდარი ადამიანისთვისაც უდიდესი თანხა იქნებოდა - ერთ დღეში 1500 დოლარი გვჭირდება მხოლოდ რეანიმაციისთვის. ცალკეა დამატებითი ანალიზების და კვლელების ხარჯები. ამიტომ, კიდევ ერთხელ გთხოვთ დახმარებას, ჩემი მახარეს გადასარჩენად. თქვენი თანადგომის გარეშე აქამდე ვერ მოვიდოდი. ყველას დიდი მადლობა, ხალხო, ვინც გვერდით მიდგახართ, ახლა თითო ლარსაც უდიდესი მნიშვნელობა აქვს. ბეწვის ხიდზე გავდივართ", - წერს ბავშვის მამა, გია ყვავაძე.
- "სკოლისაკენ უნდა მიიჩქაროდეს! მერე,სკოლიდან დაბრუნებული, შემოდგომის მზიანი დღეებით აფერადებულ ეზოში, "დედა ენით'' ხელში, აი იას უნდა კითხულობდეს! ლექსებს ისე ხმამაღლა უნდა კითხულობდეს, სამყარო უსმენდეს სულგანაბული! მაგრამ არა!..ახლა ის სიცოცხლისთვის იბრძვის! ჯერ ექვსი წლისაც არ არის! უცებ,ისე მოულოდნელად,მოვიდა განსაცდელი,ვერ გავიაზრეთ!
ისე დავიბენით,ვერ მივხვდით, რა უნდა გაგვეკეთებინა! ახლაც ვერ ვხვდები, ღმერთო, რომ ეს ტკბილი, სიცოცხლით სავსე, მეოცნებე ბიჭი ამ ურთულეს გზას გადის!
როცა ქარიშხალი ჩადგება(და მჯერა,აუცილებლად ჩადგება), მე მოვუყვები მახარეს,როგორ გაგვაერთიანა მთელი სამყარო! ყველა წამს ვთხოვ ღმერთს,არ მიგვატოვოს! ეს ბრძოლა შეგვაძლებინოს და მოგვაგებინოს", - წერს ოჯახის ახლობელი, მარინა ყვავაძე.