TikTok-ის გამოწვევის გამო, აშშ-ს პოლიცია მოსახლეობას აფრთხილებს - "საწოლიდან წამოვხტი და გავიფიქრე: ეს რა იყო?“: სახიფათო ტრენდი, რომელიც შესაძლოა, მსოფლიოს მოედოს

აშშ-ის მასაჩუსეტსის შტატის ქალაქ ვესტბოროში პოლიცია მოსახლეობას TikTok-თან დაკავშირებული სახიფათო გამოწვევის შესახებ აფრთხილებს. ახალგაზრდები საცხოვრებელ სახლებს უახლოვდებიან, შესასვლელ კარს ფეხს ურტყამენ და გარბიან. ბოლო დღეებში პოლიციამ მსგავსი შემთხვევების შესახებ რამდენიმე შეტყობინება მიიღო.

• ვესტბოროს პოლიციის დეპარტამენტის განცხადებით, ეს ძველი ხუმრობის - ზარის დარეკვისა და გაქცევის - გაცილებით სახიფათო ფორმაა. სამართალდამცველების ვარაუდით, ახალი ტენდენცია TikTok-ს უკავშირდება.

"ეს უკიდურესად სახიფათოა ყველა მონაწილისთვის, მათ შორის დაზარალებული სახლის მფლობელებისთვისაც“, - აცხადებენ პოლიციაში.

• ერთ-ერთი შემთხვევა გასულ უქმეებზე მოხდა. ქალაქის მცხოვრები ემი დუაიერი შუაღამისას ხმაურმა გააღვიძა - ვიღაც მისი სახლის შესასვლელი კარის შემტვრევას ცდილობდა.

"საწოლიდან პირდაპირ წამოვხტი და გავიფიქრე: ეს რა იყო?“ - განუცხადა მან CBS Boston-ს.

ქალმა WBZ News Boston-თან საუბრისას აღნიშნა, რომ მომხდარმა ძალიან შეაშინა. მისი თქმით, არ იცოდა, ცდილობდა თუ არა ვინმე სახლში შეღწევას, რათა მისთვის ან მისი ოჯახის წევრებისთვის ზიანი მიეყენებინა.

• ინციდენტს ფინანსური ზიანიც მოჰყვა. დუაიერის თქმით, მისი სახლის ინდივიდუალური შეკვეთით დამზადებული კარის შეცვლა 4 000 დოლარი დაჯდება.

"ოთხი ათასი დოლარი იმის გამო, რომ ვიღაც თავხედი ბავშვები ფიქრობენ, სასაცილოდ იქცევიან. საერთოდ არ მეცინება. დიდი უხერხულობაა და ძალიან შემაშფოთებელია. ბოლო რამდენიმე ღამე ნორმალურად არ მძინებია“, - განაცხადა მან.

პოლიცია აცხადებს, რომ ინციდენტებში მონაწილე პირების იდენტიფიცირებასა და მათთვის სისხლის სამართლებრივი პასუხისმგებლობის დაკისრებაზე მუშაობს.