ცნობილი ჰოლივუდელი რეჟისორი ფეხში შემთხვევით დაიჭრა - როგორ მოხვდა მაიკლ მანი საავადმყოფოში?
ჰოლივუდის ცნობილი რეჟისორი და პროდიუსერი მაიკლ მანი საავადმყოფოში გადაიყვანეს მას შემდეგ, რაც ლოს-ანჯელესში, სროლის მოედანზე, შემთხვევით დაიჭრა.
83 წლის რეჟისორი ინციდენტის დროს ცეცხლსასროლი იარაღით ვარჯიშობდა. გამოცემა TMZ-ის ინფორმაციით, შემთხვევა შაბათს, შუადღისას, ლოს-ანჯელესში მდებარე სროლის მოედანზე მოხდა.
- გამოცემის წყაროს ცნობით, მანი იარაღის ჩადებას ცდილობდა, რა დროსაც გასროლა მოხდა და რეჟისორი ფეხში დაიჭრა. დაშავებული სასწრაფო დახმარების მანქანით საავადმყოფოში გადაიყვანეს.
ადგილზე ლოს-ანჯელესის პოლიციისა და სახანძრო-სამაშველო სამსახურების წარმომადგენლები მივიდნენ. პოლიციის დეპარტამენტმა TMZ-ს დაუდასტურა, რომ ინციდენტი სროლის მოედან The Range-ში მოხდა.
გამოცემის ინფორმაციით, მომხდარი უბედური შემთხვევა იყო და რეჟისორს განზრახ არ უსვრია საკუთარი თავისთვის - ის ცეცხლსასროლი იარაღით ვარჯიშის დროს დაშავდა.
მაიკლ მანი 1980-იანი წლებიდან ჰოლივუდის ერთ-ერთ გამორჩეულ რეჟისორად ითვლება. მის ცნობილ ნამუშევრებს შორისაა "ადამიანებზე მონადირე“ (1986),"უკანასკნელი მოჰიკანი" (1992), "სიცხე“ (1995), "ალი“ (2001) და "თანამონაწილე“ (2004). კარიერის განმავლობაში რეჟისორი ოთხჯერ წარადგინეს ოსკარის ნომინაციაში, თუმცა ჯილდო არ მოუგია.
მისი ბოლო სრულმეტრაჟიანი მხატვრული ფილმი "ფერარია“, რომელიც 2023 წელს გამოვიდა. ფილმში მთავარ როლებს ადამ დრაივერი და პენელოპა კრუზი ასრულებენ.