ბომბის მუქარის მორიგი ტალღა ევროპაში - რამდენიმე აეროპორტში უსაფრთხოების ზომები გაამკაცრეს, ათობით რეისი შეფერხდა
ევროპაში ავიარეისებისა და მედიაორგანიზაციების მიმართ ბომბის მუქარის მორიგი ტალღა დაიწყო.
დიდი ბრიტანეთის მიმართულებით შესრულებული რამდენიმე ავიარეისი და ევროპული მედიასაშუალებები პარასკევს ბომბის მუქარის სამიზნე გახდნენ. მუქარის შემცველი ელექტრონული წერილები მიიღეს ბრიტანულმა Sky News-მა, ირლანდიის საზოგადოებრივმა მაუწყებელმა RTÉ-მ და ბულგარულმა Nova TV-მ.
პარალელურად, პრაღის, სოფიისა და კოპენჰაგენის აეროპორტებში უსაფრთხოების ზომები გაამკაცრეს. ევროპაში ავიამიმოსვლა უკვე მესამე დღეა შეფერხებულია.
RTÉ - სთვის გაგზავნილ წერილში ნათქვამი იყო, რომ ამ კვირაში მომხდარი ინციდენტები "მხოლოდ დასაწყისია“. წერილის ავტორი ამტკიცებდა, რომ მაუწყებლის შენობაში ასაფეთქებელი მოწყობილობა იყო მოთავსებული, რომელიც 45 წუთში აფეთქდებოდა.
ირლანდიის საზოგადოებრივმა მაუწყებელმა მუქარა დილის 9 საათამდე ცოტა ხნით ადრე მიიღო. ამის შემდეგ დუბლინში მდებარე RTÉ-ს კამპუსი დაიკეტა და პოლიციამ შენობის შემოწმება დაიწყო. მაუწყებლის საინფორმაციო გადაცემები გარკვეული დროით შეფერხდა.
- ირლანდიის პრემიერ-მინისტრმა მიხაელ მარტინმა მომხდარს "ძალიან სერიოზული“ უწოდა და განაცხადა, რომ ხელისუფლება პასუხისმგებელი პირების გამოვლენაზე მუშაობს. მისი თქმით, მსგავსი ქმედებები საზოგადოებაში შიშისა და არეულობის გამოწვევას ისახავს მიზნად.
მუქარის წერილი მიიღო ბრიტანულმა Sky News-მაც, ხოლო ბულგარეთში სამიზნე ტელეკომპანია Nova TV გახდა.
პარასკევს საფრთხის შესახებ შეტყობინებები მიიღეს პრაღის აეროპორტშიც. ჩეხეთის პოლიციის ინფორმაციით, მუქარა სულ მცირე ცხრა რეისს შეეხო - ოთხს, რომლებიც პრაღაში უნდა ჩაფრენილიყვნენ, და ხუთს, რომლებიც აეროპორტიდან უნდა გაფრენილიყვნენ. მათ შორის იყო დიდი ბრიტანეთის მიმართულებით შესრულებული ფრენებიც.
- პოლიციის წარმომადგენლის, დენისა ჰეიტმანკოვას განცხადებით, მუქარა დანიიდან, ესპანეთიდან და დიდი ბრიტანეთიდან შემომავალ რეისებს, ასევე ნიდერლანდების, კვიპროსის, რუმინეთის, იტალიისა და დიდი ბრიტანეთის მიმართულებით გამავალ ფრენებს ეხებოდა.
საფრთხის შესახებ შეტყობინებები მიიღეს სოფიისა და კოპენჰაგენის აეროპორტებშიც.
სოფიაში ლონდონის სტენსტედისა და ბრიუსელის მიმართულებიდან ჩაფრენილი ორი თვითმფრინავი უსაფრთხოდ დაეშვა. კოპენჰაგენის აეროპორტში კი პოლიცია საჰაერო მიმოსვლის წინააღმდეგ მიმართული მუქარის გამო იყო მობილიზებული. დანიის პოლიციის განცხადებით, მგზავრებს საფრთხე არ ემუქრებოდათ.
ბოლო დღეებში ბომბის შესახებ ცრუ შეტყობინებებმა ევროპის მასშტაბით ათობით რეისი შეაფერხა. მხოლოდ ხუთშაბათს მუქარის გამო, სულ მცირე 27 ფრენა გადაიდო ან მათი მარშრუტი შეიცვალა. რამდენიმე თვითმფრინავს სამხედრო გამანადგურებლები აცილებდნენ, ხოლო დაშვების შემდეგ ბორტებს ასაფეთქებელი ნივთიერებების არსებობაზე ამოწმებდნენ. ჯერჯერობით არცერთ შემთხვევაში ასაფეთქებელი მოწყობილობა არ აღმოჩენილა.
მუქარის წერილებს შორის იყო შეტყობინებები, რომლებსაც ხელს აწერდნენ "მამაკაცთა სახელმწიფოს მებრძოლები“ - რუსული რადიკალური მიზოგინისტული მოძრაობის სახელით მოქმედი პირები. თუმცა, მოძრაობის დამფუძნებელმა ვლადისლავ პოზდნიაკოვმა ჯგუფის კავშირი მომხდართან უარყო. მისი განცხადებით, მოძრაობა 2021 წლიდან აღარ არსებობს და ვიღაცები მის სახელს საკუთარი მიზნებისთვის იყენებენ.