"მეუღლეს ვუღალატე..." - ტექნოლოგიური გიგანტის, Nvidia აღმასრულებელი დირექტორის სკანდალური საქმე: მას რომანი ჰქონდა სავარაუდოდ ჩინელ ჯაშუშთან: გამოძიების დეტალები

Nvidia-ს დამფუძნებელმა და აღმასრულებელმა დირექტორმა ჯენსენ ჰუანგმა თანამშრომლებისთვის გაგზავნილ წერილში აღიარა, რომ მეუღლეს უღალატა. ეს კი მას შემდეგ გააკეთა, რაც მედიაში გავრცელდა ინფორმაცია ჩინელ ბიზნესმენ ალის ჰუანგთან მისი სავარაუდო რომანის შესახებ.

ქალი აშშ-ის სადაზვერვო სამსახურების მიერ ჩინეთის სასარგებლოდ ჯაშუშობაშია ეჭვმიტანილი. სკანდალის ფონზე Nvidia-ს დირექტორთა საბჭომ დამოუკიდებელი გამოძიება დაიწყო.

• "მეუღლეს ვუღალატე. ჩემმა საქციელმა მას და ჩვენს შვილებს ტკივილი მიაყენა. ამის გამართლება არ არსებობს. გულწრფელად ვწუხვარ“, - წერს ჰუანგი.

მისი თქმით, ოჯახი მთელი ცხოვრების განმავლობაში მის გვერდით იყო, მხარს უჭერდა, თუმცა თავად მათ იმედი გაუცრუა.

ჰუანგმა მეუღლესა და შვილებს ბოდიში მოუხადა და გამოთქვა იმედი, რომ დროთა განმავლობაში მათი ნდობის დაბრუნებას შეძლებს. მან საზოგადოებას ოჯახის პირადი ცხოვრების მიმართ პატივისცემის გამოჩენაც სთხოვა.

საქმე მხოლოდ პირად ურთიერთობას არ ეხება. აშშ-ის სადაზვერვო სამსახურები ალის ჰუანგს ჩინეთის სახელმწიფო უსაფრთხოების სამინისტროსთან შესაძლო კავშირის გამო აკვირდებოდნენ.

• გავრცელებული ცნობით, არსებობდა ეჭვი, რომ ქალი Nvidia-ს ხელმძღვანელთან დაახლოებით მოწინავე ხელოვნური ინტელექტის ჩიპებისა და აშშ-ის მთავრობის საქმიანობის შესახებ საიდუმლო ინფორმაციის მოპოვებას ცდილობდა.

ალის ჰუანგი, რომელიც ჰუანგ ლის სახელითაც არის ცნობილი, სინგაპურში დაფუძნებული მონაცემთა ცენტრების კომპანია MegaSpeed-ის ყოფილი ხელმძღვანელია.

მედიაში გავრცელდა ფოტოები, რომლებზეც ჯენსენ ჰუანგი და ალის ჰუანგი ტაიპეიში ერთად არიან გადაღებული. ერთ-ერთ ფოტოზე, რომელიც 2024 წლით თარიღდება, ისინი ბარში სხედან, მეორე კი 2025 წლის მაისში, რესტორნიდან გამოსვლისას არის გადაღებული.

Nvidia-ს დირექტორთა საბჭოს განცხადებით, გამოძიებას დამოუკიდებელი დირექტორებისგან შემდგარი კომიტეტი გარე იურიდიული მრჩევლების დახმარებით ჩაატარებს. ჰუანგმა გამოძიებასთან სრულად თანამშრომლობის პირობა დადო.

• კომპანიაში აცხადებენ, რომ ამ დროისთვის არ აქვთ საფუძველი ივარაუდონ, რომ ჰუანგის სავარაუდო კავშირის შედეგად Nvidia-ს კონფიდენციალური ინფორმაცია ან აშშ-ის ეროვნული უსაფრთხოება დაზარალდა. მიუხედავად ამისა, გამოძიების ფარგლებში, ყველა ხელმისაწვდომი ინფორმაცია შემოწმდება. საბჭომ ასევე დაადასტურა, რომ კვლავ ენდობა ჰუანგს და მის გუნდს.

ჰუანგისა და ალისის ურთიერთობის შესახებ პირველი ცნობები 29 ოქტომბერს გავრცელდა. მაშინ Nvidia-ს წარმომადგენელმა ჯონ რიცომ კომპანიის ხელმძღვანელისა და ქალის ურთიერთობაში უჩვეულო ვერაფერი დაინახა. მისი განცხადებით, მომხმარებელ კომპანიებთან შეხვედრები აღმასრულებელი დირექტორის საქმიანობის ჩვეულებრივი ნაწილია და ჰუანგი ყოველწლიურად ათასობით კომპანიის ხელმძღვანელს ხვდება.

ჯენსენ ჰუანგი Nvidia-ს ერთ-ერთი დამფუძნებელია და კომპანიას 30 წელზე მეტია ხელმძღვანელობს. Nvidia ხელოვნური ინტელექტის განვითარებისთვის საჭირო ჩიპების უმსხვილესი მწარმოებელია და ამ სფეროში წამყვან ტექნოლოგიურ კომპანიებს, მათ შორის OpenAI-სა და Meta-ს, ამარაგებს.