ჩინეთში, საცხოვრებელ სახლში გაჩენილ ხანძარს სულ მცირე 14 ადამიანი ემსხვერპლა - რა არის ცნობილი ტრაგიკული შემთხვევის შესახებ

ჩინეთის ჩრდილოეთ პროვინცია შანქსის დედაქალაქ ტაიუანში, მაღალსართულიან საცხოვრებელ კორპუსში გაჩენილ ხანძარს სულ მცირე 14 ადამიანი ემსხვერპლა, 25 კი დაშავდა.

• ინფორმაციას სააგენტო Reuters-ი ჩინეთის სახელმწიფო მედიაზე დაყრდნობით ავრცელებს.

ხანძარი 8 ნოემბერს, საღამოს, ქალაქის ცენტრში, ერთ-ერთ მთავარ გზაზე მდებარე 40-სართულიან შენობაში გაჩნდა. შემთხვევის ადგილზე მობილიზებული იყვნენ მეხანძრეები, რომლებიც ცეცხლის ლოკალიზებას სპეციალური ამწეების მეშვეობით ცდილობდნენ.

ადგილობრივი ხელისუფლების ინფორმაციით, ხანძრის ლოკალიზების სამუშაოები საღამოს 8:30 საათისთვის დასრულდა.

ადგილობრივმა სამედიცინო დახმარების ბრიგადებმა საავადმყოფოში სულ მცირე 38 ადამიანი გადაიყვანეს, მათგან 14-ის გადარჩენა ვერ მოხერხდა. ამ დროისთვის სამედიცინო დაწესებულებაში რჩება 25 დაშავებული, რომელთაგანაც ცხრა მძიმე მდგომარეობაშია.

ჩინეთის ხელისუფლებამ მომხდარზე გამოძიება დაიწყო. ამ დროისთვის ხანძრის გამომწვევი მიზეზი უცნობია.

წყარო