ცნობილი ტელეწამყვანი ქმარმა მოკლა - რას წერს მედია რაბია აპსანის შესახებ? - "მკვლელობამდე ცოტა ხნით ადრე ქალმა ვიდეო გამოაქვეყნა"
პაკისტანში 41 წლის ტელეწამყვანი რაბია აჰსანი საკუთარ სახლში მოკლეს. ადგილობრივი მედიის ინფორმაციით, მას ცეცხლსასროლი იარაღიდან ქმარმა, აჰსან თაჰირმა ესროლა. შემთხვევა კვირას, რავალპინდიში მოხდა - რამდენიმე საათით ადრე აჰსანს YouTube-არხზე აშშ-ის შუალედური არჩევნების შესახებ ვიდეო ჰქონდა გამოქვეყნებული.
- აჰსანი პოპულარულ საინფორმაციო არხ "92 News“-ში მუშაობდა. გავრცელებული ინფორმაციით, შემთხვევის დროს მისი დედა და და სახლში იმყოფებოდნენ. მათ გასროლის ხმა გაიგეს, რის შემდეგაც საძინებელში შევიდნენ და ტელეწამყვანი სისხლის გუბეში მწოლიარე იპოვეს. ოთახში მისი ქმარიც იმყოფებოდა, რომელსაც ხელში იარაღი ეჭირა.
პოლიციის ცნობით, აჰსანს ორი ჭრილობა ჰქონდა მიყენებული - ერთი კისრის ქვემოთ, მეორე კი ზურგის მარჯვენა მხარეს. ის ადგილზე გარდაცვლილად გამოაცხადეს.
- პოლიციამ შემთხვევის ადგილიდან პისტოლეტი ამოიღო, აჰსან თაჰირი კი დააკავა. ადგილობრივი მედიის ინფორმაციით, მამაკაცს იარაღის ფლობის მოქმედი ნებართვა არ ჰქონდა. დაკითხვისას მან განაცხადა, რომ გასროლა შემთხვევით მოხდა.
რაბია აჰსანსა და მის ქმარს ორი შვილი ჰყავდათ. გავრცელებული ცნობებით, წყვილს ოჯახური კონფლიქტის ისტორია არ ჰქონია.
რავალპინდის პოლიციის წარმომადგენელმა, ჰასან მუშტაკ სუხერეამ, განაცხადა, რომ საქმეზე მიუკერძოებელი გამოძიება ჩატარდება. ტელეწამყვანის გარდაცვალებას პაკისტანის ოფიციალური პირებიც გამოეხმაურნენ.
"ასეთი შემთხვევები სერიოზულ ყურადღებასა და პასუხისმგებლობას მოითხოვს. ქალებს უნდა შეეძლოთ ცხოვრება და მუშაობა შიშის გარეშე“, - განაცხადა პაკისტანის პირველმა ლედიმ, ასიფა ბჰუტო-ზარდარიმ.