მოდელ კრისტი ყიფშიძეს მამა გარდაეცვალა. სამწუხარო ამბავი სოციალურ ქსელში კრისტის შვილმა, მსახიობმა ნატალია ყიფშიძემ გაავრცელა.
მსახიობს ბაბუასთან განსაკუთრებული ურთიერთობა ჰქონდა. 2024 წელს გამოქვეყნებულ ემოციურ პოსტში ის წერდა, რომ სწორედ ბაბუამ ასწავლა ქვეყნის სიყვარული, საკუთარი აზრის ქონა და მისი გამოხატვა. ნატალია აღნიშნავდა, რომ არკადი სარქისოვი, რომელსაც ოჯახში ბავშვობიდან "ბიჭის“ ეძახდნენ, მისთვის სამაგალითო იყო.
"ბიჭი ბაბუმ მასწავლა ქვეყნის სიყვარული, საკუთარი აზრის ქონა და მისი გამოხატვა საჭიროების მიზნით“, – წერდა მსახიობი.
"დილით რომ ვიღვიძებ, მეხუტება და მეუბნება, რომ ამაყობს ჩემით და მეც ყოველდღე ვიამაყებ ჩემი ბაბიკოთი, რომელიც დღემდე ბროწეულის წვენს ხელით მიწურავს და საკუთარი შვილივით მზრდის“, - წერდა ნატალია.
2013 წელს გამოცემა "გზასთან“ ინტერვიუში არკადი სარქისოვი საკუთარი ცხოვრების შესახებ ჰყვებოდა. ავლაბარში დაბადებული და გაზრდილი კაცი იმავე სახლში ცხოვრობდა, რომელიც 1958 წელს ბაბუამ და მშობლებმა ააშენეს.
არკადი სარქისოვი 40 წლის ასაკში მომხდარი ტრაგიკული ამბის შემდეგ ეტლს მიეჯაჭვა. ყველაფერი 1997 წელს დაიწყო, როდესაც გზაზე გაჩერებული ცეცხლმოკიდებული "ზაპოროჟეცის“ დასახმარებლად მივიდა. მანქანაში გაჩენილი ხანძრის ჩაქრობაში მონაწილეობა მიიღო და ხელები დაეწვა. მოგვიანებით გაირკვა, რომ ორგანიზმში სტაფილოკოკური ინფექცია შეეჭრა.
ინტერვიუში არკადი მძიმე პერიოდს იხსენებდა და ამბობდა, რომ თითქმის სამი წლის განმავლობაში აუტანელ ტკივილებს განიცდიდა. მიუხედავად ყველაფრისა, ვარჯიშს არ წყვეტდა და იმედს არ კარგავდა, რომ მდგომარეობას გაიუმჯობესებდა.
"ფეხის ტერფებსა და თითებს ვამოძრავებ, აქამდე კი ესეც არ შემეძლო. მოკლედ, სულ ვვარჯიშობ და მგონია, რომ წინსვლა ამის დამსახურებაა“, - ამბობდა ის.
მისი თქმით, ძირითადად იოგით იყო დაკავებული და ვარჯიშებს დამოუკიდებლად ასრულებდა.
იმავე ინტერვიუში კრისტი ყიფშიძეც საუბრობდა მამის შესახებ. მისი თქმით, არკადის შინაგანი სიმტკიცე და ოპტიმიზმი ოჯახს მძიმე განსაცდელის გადატანაში ეხმარებოდა.
"მამაჩემი შინაგანად ძლიერი და ოპტიმისტი რომ არ ყოფილიყო, ამ განსაცდელის გადატანა ძალიან გაგვიჭირდებოდა. მუდმივად რაღაცას გეგმავს: ახლა ვივარჯიშებ, ახლა ამას ვიზამ, იმას ვიზამ...“ – ამბობდა კრისტი.