რომელია ყველაზე მრავალრიცხოვანი გვარი საქართველოსა და მსოფლიოში?

ქვეყანაში შექმნილ დემოგრაფიულ სიტუაციაზე ხშირად გამოითქმება ურთიერთსაწინააღმდეგო მოსაზრებები: სპეციალისტთა ნაწილი დემოგრაფიულ ბუმზე ლაპარაკობს, ნაწილი კი - დემოგრაფიულ ზამთარზე. აღინიშნება ისიც, რომ რეგიონების მიხედვით, დემოგრაფიული მაჩვენებლები ძალიან განსხვავებულია.

იუსტიციის სამინისტროს სამოქალაქო რეესტრის სააგენტოს ინფორმაციით, ყველაზე სწრაფი მატება აღინიშნება ქართულ გვარებში:

1. ბერიძე, 2. ბოლქვაძე, 3. შაინიძე, 4. სურმანიძე, 5. კაპანაძე, 6. ცუცქირიძე, 7. დავითაძე, 8. დიასამიძე, 9. მახარაძე, 10. აბაშიძე, 11. დუმბაძე, 12. ფუტკარაძე, 13. მიქელაძე. 14. აბულაძე, 15. ზოიძე, 16. თურმანიძე, 17. გელაშვილი, 19. შავაძე, 19. ირემაძე, 20. ქათამაძე.

ქვეყანაში ყველაზე მრავალრიცხოვანი გვარებია:

1. ბერიძე - 26.796 კაცი; 2. მამედოვი - 25.968; 3. კაპანაძე - 17.976; 4. ალიევი - 17.605; 5. გელაშვილი - 17.221; 6. მაისურაძე - 15.352; 7. გიორგაძე - 13.230; 8. ლომიძე - 12.301; 9. წიკლაური - 12.220; 10. ბოლქვაძე - 11.650.

ეს, რაც შეეხება საქართველოს, მაგრამ რომელია მსოფლიოში ყველაზე გავრცელებული გვარი?

1. ლი - ამ გვარს 100 მილიონი ადამიანი ატარებს, იგი გავრცელებულია ჩინეთში, ვიეტნამსა და კორეაში.

2. ვანი - ამ გვარის 93 მილიონი წარმომადგენელი ცხოვრობს კორეაში, ჩინეთში, იაპონიასა და ვიეტნამში. ვანი ჩინურად მეფეა.

3. გარსია - 10 მილიონი. ესპანეთში მოსახლეობის 4 პროცენტი გვარად გარსიაა. ამ გვარის ხალხი ცხოვრობს კუბაზე, ესპანეთში, ფილიპინებზე, აშშ-სა და მექსიკაში.

4. გონსალესი - 10 მილიონი. ესპანეთში ის ერთ-ერთი ყველაზე პოპულარული გვარია, ასევე ფართოდაა გავრცელებული არგენტინაში, ჩილეში, ვენესუელასა და პარაგვაიში.

5. სმიტი - ამ ინგლისური გვარის 4 მილიონზე მეტი წარმომადგენელი დიდ ბრიტანეთში, ავსტრალიაში, კანადასა და ამერიკის შეერთებულ შტატებში ცხოვრობს, მხოლოდ აშშ-ში 3 მილიონი სმიტია.

6. სმირნოვი - 2,5 მილიონი. სტატისტიკით, იგი ყველაზე გავრცელებული გვარია რუსეთში.

7. მიულერი - 1 მილიონი მიულერი, რაც გერმანულად მეწისქვილეს ნიშნავს, გერმანიაში, შვეიცარიასა და ავსტრიაში ცხოვრობს.

ნინო კვიტაშვილი

ყოველკვირეული გაზეთი "ყველა სიახლე"

(გამოდის ოთხშაბათობით)