სოფელ ველისციხეში მგლები ცხვრის ფარას თავს დაესხნენ

გურჯანიის რაიონის სოფელ ველისციხეში მგლები ომარაშვილების კუთვნილ ცხვრის ფარას გამთენიისას დაესხნენ თავს.

როგორც "ინტერპრესნიუსის" კორესპონდენტი იუწყება, მგლებმა 9 სული ცხვარი შეჭამეს, ხოლო 45 ცხვარი დაგლეჯილია. სოფელში ამბობენ, რომ ეს პირველი შემთხვევა არ არის, როდესაც მგელი სოფელს ესხმის თავს და ადგილობრივები ხელისუფლებისგან სამონადირეო ჯგუფების შექმნას ითხოვენ.

როგორც დაზარალებული ოჯახის წევრები აცხადებენ, დაახლოებით 5 მგელი იყო და ამ თავდასხმის შედეგად 7 000 ლარის ოდენობის ზარალი მიიღეს.

"ინტერპრესნიუსი"