მედია გარემო მრავალფეროვნებით ხასიათდება, თუმცა მედიასაშუალებები პოლიტიკური ნიშნით რჩებიან დაყოფილი და მხოლოდ რამდენიმე მათგანი ახერხებს უფრო დამოუკიდებელი სარედაქციო პოლიტიკის წარმოებას, - ამის შესახებ ეუთოს დემოკრატიული ინსტიტუტებისა და ადამიანის უფლებების ოფისის არჩევნებზე სადამკვირვებლო მისიის (OSCE/ODIHR) პირველ შუალედურ ანგარიშშია ნათქვამი, რომელიც 22 აგვისტოდან 5 სექტემბრამდე პერიოდს მოიცავს.
უფრო კონკრეტულად, მისიის განმარტებით, "რუსთავი 2" და "იმედი" ძირითადად მთავრობის მომხრე ტელეკომპანიებად აღიქმებიან, "კავკასიის", "მაესტროსა" და ახლახანს აღდგენილი "მე-9 არხის" მაუწყებლობა კი ძირითადად ოპოზიციის მხარდამჭერად.
ამასთან, მისიის ცნობით, 30 აგვისტოს ეუთო-ს დემოკრატიული ინსტიტუტებისა და ადამიანის უფლებათა ოფისმა პრაიმტაიმში საარჩევნო თემატიკის გაშუქების რაოდენობრივი და ხარისხობრივი მონიტორინგი დაიწყო, რომელიც რვა ტელეკომპანიასა და ორ გაზეთს მოიცავს.
ეუთო-ს დემოკრატიული ინსტიტუტებისა და ადამიანის უფლებათა ოფისის არჩევნებზე დაკვირვების მისია მუშაობას 22 აგვისტოს შეუდგა, მისია თბილისში მომუშავე 16 ძირითადი ექსპერტისა და საქართველოს მასშტაბით მომუშავე 28 გრძელვადიანი დამკვირვებლისგან შედგება.